11693 ۔۔۔ ناشرۃ بن سمی الیزنی فرماتے ہیں کہ یوم جابیہ میں میں نے سناحضرت عمر (رض) لوگوں کے سامنے خطبہ بیان فرما رہے تھے بیشک اللہ تعالیٰ نے مجھے اس مال کا خازن اور اس کو تقسیم کرنے والا بنایا ہے پھر فرمایا کہ بلکہ اللہ ہی اس کو تقسیم کرتے ہیں اور میں ابتداء کرنے والا ہوں جناب نبی کریم (صلی اللہ علیہ وآلہ وسلم) کے گھر والوں سے پھر درجہ بدرجہ جو زیادہ معزز ہو، چنانچہ امہات المومنین (رض) کے لیے بھی وظائف مقرر فرمائے علاوہ حضرت جویریہ، حضرت صفیہ اور حضرت میمونہ (رض) کے ام المومنین حضرت عائشہ صدیقہ (رض) نے فرمایا کہ جناب رسول اکرم (صلی اللہ علیہ وآلہ وسلم) ہمارے درمیان عدل فرمایا کرتے تھے ، اور حضرت عمر (رض) نے بھی ہمارے درمیان عدل فرمایا ہے پھر فرمایا کہ میں اپنے آپ سے اور اپنے مہاجرین ساتھیوں سے شروع کرنے والاہوں اور پھر جو زیادہ معزز ہو، کیونکہ ہمیں ظلم اور دشمنی کی بناء پر ہمارے گھروں سے نکالا گیا، چنانچہ پھر ان میں اھل بدر کے لیے پانچ پانچ ہزار مقرر فرمائے اور انصار میں سے اھل بدر کے چارچار ہزار مقرر فرمائے ، اور اھل حدیبہ کے لیے تین تین ہزار مقرر فرمائے اور فرمایا کہ جس نے ہجرت میں جلدی کی اس کے لیے عطانے بھی جلدی کی، اور جو ہجرت میں پیچھے رہ گیا اس کا وظیفہ بھی پیچھے رہ گیا سو کوئی شخص اپنی سواری کے علاوہ اور کسی کو ملامت نہ کرے “۔ (سنن کبری بیھقی)