12620 ابوالزبیر سے مروی ہے کہ میں مقام عرفات میں حضرت ابن عمر (رض) کے ساتھ کھڑا تھا جب سورج چھپ گیا تو آپ (رض) عرفات سے نکلے اس طرح کہ آپ پر سکون اور وقار چھایا ہوا تھا۔ آپ (رض) اسی طرح چلتے رہے حتیٰ کہ ہم وادی کے شروع حصے تک پہنچ گئے۔ جب اور لوگ گزر گئے تو آپ (رض) نے اپنی بائیں طرف سواری کو رکایا اور اتر کر وضو کا پانی منگوایا اور وضو سے فارغ ہو کر ارشاد فرمایا : میں نے رسول اللہ (صلی اللہ علیہ وآلہ وسلم) کو اسی طرح کرتے ہوئے دیکھا تھا حتیٰ کہ آپ (صلی اللہ علیہ وآلہ وسلم) اس وادی تک آپہنچے تھے ۔ پھر آپ (رض) نے اپنی سواری منگوائی اور اس پر سوار ہو کر اللہ اکبر کہا اور سواری کو تیز کردیا اور اسی رفتار سے اس وادی کو عبور کیا پھر آپ (رض) پر سکینہ اور وقار طاری ہوگیا پھر اسی طرح (نرم رفتاری کے ساتھ چلتے ہوئے) وادی تک پہنچ گئے وہاں آپ نے پھر اللہ اکبر کہا اور سواری تیز کردی حتیٰ کہ اسی تیز رفتاری کے ساتھ وادی کو عبور کیا اور مزدلفہ پہنچ گئے۔ وہاں آپ (رض) نے اپنی سواری بٹھائی اور وہاں رات بسر کی پھر صبح آپ (رض) وہاں ٹھہر گئے جب سورج نکلنے کو ہوا تو وہاں سے نکل کھڑے ہوئے اور جب نکلے تو آپ پر مکمل اطمینان اور سکون طاری تھا آپ اسی طرح (سواری پر) چلتے ہوئے وادی بطن محسر تک پہنچے، وہاں آپ (رض) نے سواری کو تیز کردیا اور اسی تیز رفتاری کے ساتھ اس وادی کو عبور کیا۔ پھر وہاں سے نکلے تو آپ پر پہلے کی سکینہ اور وقار کی کیفیت طاری ہوگئی اور اسی نرم رفتاری سے آپ جمرہ قصوی (چھوٹے شیطان) کے پاس پہنچ گئے۔ ابن جریر