13477 یحییٰ بن عبدالرحمن بن حاطب سے مروی ہے کہ عبدالرحمن بن حاطب کی وفات ہوگئی۔ انھوں نے اپنے غلام باندیوں میں سے جو نماز روزہ کرتے تھے ان کو آزاد کردیا تھا۔ ایک باندی نماز روزے کی پابند تھی جو عجم سے تعلق رکھتی تھی اور زیادہ سمجھ بوجھ نہ رکھتی تھی، عبدالرحمن کی زندگی کا واقعہ ہے کہ ایک مرتبہ ان کو اچانک اس بات کا علم ہوا کہ وہ باندی حاملہ ہوگئی ہے۔ وہ پہلے شادی شدہ رہ چکی تھی۔ عبدالرحمن اس خبر سے گھبراگئے عبدالرحمن حضرت عمر (رض) کے پاس گئے اور ان کو یہ خبر سنائی۔ حضرت عمر (رض) نے ان کو فرمایا : تم ایسے آدمی ہو جو خیر کی خبر نہیں لاتے۔ اس بات سے عبدالرحمن مزید گھبراگئے۔ پھر حضرت عمر (رض) نے اس باندی کے پاس پیغام بھیجا وہ آئی تو آپ نے اس سے پوچھا : کیا تو حاملہ ہے ؟ اس نے چہک چہک کر خوشی سے کہا : ہاں موعوش سے ہوئی ہوں دو درہموں کے بدلے۔ باندی نے اس واقعے کو قطعاً نہ چھپایا گویا یہ کوئی بری چیز نہیں ہے۔ حضرت عمر (رض) کے پاس حضرت علی (رض) ، حضرت عثمان (رض) اور حضرت عبدالرحمن بن عوف (رض) بھی موجود تھے۔ حضرت عمر (رض) نے فرمایا : تم لوگ مجھے اس کے متعلق کوئی مشورہ دو ۔ حضرت علی اور حضرت عبدالرحمن (رض) نے تو فرمایا اس پر حد واقع ہوگی۔ حضرت عمر (رض) نے حضرت عثمان (رض) سے پوچھا : اے عثمان ! تم بھی کچھ کہو۔ حضرت عثمان (رض) نے عرض کیا آپ کے بھائیوں نے آپ کو مشورہ دیدیا ہے۔ حضرت عمر (رض) نے فرمایا : نہیں آپ بھی کچھ بولیں۔ حضرت عثمان (رض) نے فرمایا : میرا خیال ہے یہ جو خوشی کے ساتھ تیز آواز میں اس خبر کو سنارہی ہے اس سے معلوم ہوتا ہے کہ اس کو اس عمل کی برائی کا علم نہیں تھا اور یہ اس میں کوئی حرج نہیں سمجھتی تھی۔ جبکہ حد اس شخص پر ہے جو جانتا ہو (پھر بھی گناہ کرے) تب حضرت عمر (رض) نے فرمایا : تم نے سچ کہا ۔ قسم ہے اس ذات کی جس کے ہاتھ میں میری جان ہے حد اسی پر ہے جو اس کو جانتا ہو۔ الشافعی، الجامع لعبد الرزاق، السنن للبیہقی