13482 کثیر بن الصلت سے مروی ہے کہ ابن العاص اور زید بن ثابت قرآن شریف کے نسخے لکھا کرتے تھے۔ دونوں اس آیت پر پہنچے تو زید بولے : میں نے رسول اللہ (صلی اللہ علیہ وآلہ وسلم) کو یہ آیت تلاوت کرتے سنا ہے :
الشیخ والشیخۃ، اذاز نیافار جموھما البۃ
بوڑھا اور بوڑھی جب زنا کریں تو دونوں کو رجم کردو۔
حضرت عمر (رض) نے فرمایا : جب یہ آیت نازل ہوئی تو میں نبی اکرم (صلی اللہ علیہ وآلہ وسلم) کے پاس حاضر خدمت ہوا تھا۔ میں نے آپ (صلی اللہ علیہ وآلہ وسلم) سے عرض کیا تھا : یہ آیت مجھے لکھوادیں۔ لیکن آپ نے اس کو لکھوانا گویا پسند نہ کیا۔ حضرت عمر (رض) نے عرض کیا : کیا آپ نہیں سمجھتے کہ بوڑھا جب زنا کرے اور وہ شادی شدہ (آزاد) ہو تو اس کو کوڑے بھی لگیں گے اور رجم بھی ہوگا اور اگر شادی شدہ (یا آزاد) نہ ہو تو صرف کوڑے لگیں گے اور اگر جوان آدمی جو شادی شدہ اور آزاد ہو وہ زنا کرے تو اس کو رجم (سنگسار) کیا جائے گا۔ ابن جریر
سیوطی (رح) فرماتے ہیں یہ روایت صحیح ہے۔ یہ حدیث حضرت عمر کے توسط سے مرفوعاً نبی (صلی اللہ علیہ وآلہ وسلم) سے مروی ہونا صرف اسی ایک طریق سے منقول ہے اور یہ طریق ہمارے نزدیک صحیح ہے اس میں کوئی علت نہیں جو اس کو کمزور کرے، نہ کوئی ایسا سبب ہے جو اس کو ضعیف کرے کیونکہ اس کے ناقلین ثقہ ہیں۔ اگرچہ یہ علت کہی جاتی ہے کہ قتادہ مدلس ہے اور انھوں نے سماء اور تحدیث کی تصریح نہیں فرمائی۔