13549 ابن عمر (رض) سے مروی ہے کہ یہوداپنے ایک آدمی اور ایک عورت کو لے کر حضور نبی اکرم (صلی اللہ علیہ وآلہ وسلم) کی خدمت میں آئے۔ ان دونوں مردو عورت نے زنا کا ارتکاب کیا تھا۔ حضور (صلی اللہ علیہ وآلہ وسلم) نے ان سے دریافت فرمایا کہ تم میں سے جو زنا کرتے ہیں تم ان کے ساتھ کیا برتاؤ کرتے ہو ؟ انھوں نے جواب دیا کہ ہم ان کو مار پیٹ کرتے ہیں۔ حضور (صلی اللہ علیہ وآلہ وسلم) نے دریافت فرمایا : توراۃ میں اس کا کیا حکم پاتے ہو ؟ انھوں نے جواب دیا : ہم توراۃ میں کچھ نہیں پاتے۔ حضرت عبداللہ بن سلام نے فرمایا : تم جھوٹ بولتے ہو ! توراۃ میں رجم کا حکم موجود ہے۔ توراۃ لاؤ اور اس کو پڑھو اگر تم سچے ہو۔ چنانچہ یہود توراۃ لے کر آئے۔ ان کے قاری جو توراۃ پڑھا کرتا تھا آیت رجم پر اپنی ہتھیلی رکھ لی اور اس سے آگے پیچھے پڑھنے لگا۔ آیت رجم کو نہیں پڑھا۔ عبداللہ بن سلام نے اس کا ہاتھ وہاں سے اٹھایا اور پوچھا یہ کیا ہے ؟ جب یہودیوں نے بھی دیکھ لیا تو تب کہنے لگے : ہاں یہ آیت رجم تو ہے۔ چنانچہ رسول اللہ (صلی اللہ علیہ وآلہ وسلم) نے دونوں کو رجم کرنے کا حکم دیا۔ اور جہاں جنازے رکھے جاتے تھے وہاں رجم کردیا گیا۔ الجامع لعبد الرزاق