13553 حضرت ابو ہریرہ (رض) سے مروی ہے کہ اسلمی حضور اکرم (صلی اللہ علیہ وآلہ وسلم) کے پاس حاضر خدمت ہوا اور اپنے آپ پر چار بار گواہی دی کہ ان سے ایک عورت کے ساتھ حرام کاری سرزد ہوگئی ہے ہر مرتبہ نبی اکرم (صلی اللہ علیہ وآلہ وسلم) ان سے اعراض برتتے رہے۔ پھر پانچویں بار اسلمی کی طرف متوجہ ہوئے اور پوچھا : کیا تو اس پر غالب آگیا تھا ؟ عرض کیا : جی ہاں۔ پوچھا : کیا تیرا نفس اس میں اس طرح غائب ہوگیا تھا جس طرح سرمچوسرمہ دانی میں اور ڈول کنویں میں غائب ہوجاتا ہے ؟ عرض کیا : جی ہاں۔ آپ (صلی اللہ علیہ وآلہ وسلم) نے پوچھا : کیا تو جانتا ہے زنا کیا ہے ؟ عرض کیا : جی ہاں، میں اس عورت سے حرام طریقے سے مبتلا ہوا جس طرح اپنی بیوی کے ساتھ حلال طریقے سے ملتے ہیں۔ آپ نے پوچھا : اب تو اس اقرار سے کیا حاصل کرنا چاہتا ہے ؟ عرض کیا : میری خواہش ہے کہ آپ مجھے اس گناہ سے پاک کردیں۔
چنانچہ آپ (صلی اللہ علیہ وآلہ وسلم) نے حکم دیا اور اس کو رجم کردیا گیا۔
آپ (صلی اللہ علیہ وآلہ وسلم) نے دو آدمیوں کو آپس میں بات چیت کرتے سنا۔ ایک دوسرے کو کہہ رہا تھا : اس کو دیکھ ! اللہ نے اس کا گناہ چھپایا لیکن اس کے ضمیر نے اس کو چھوڑا نہیں حتیٰ کہ وہ کتے کی طرح سنگسار ہوگیا۔ نبی اکرم (صلی اللہ علیہ وآلہ وسلم) ان کی گفتگو سن کر خاموش ہوگئے۔ پھر تھوڑی دور چلے تھے کہ ایک مردار گدھے کے پاس سے گزر ہوا جس کی ٹانگیں اوپر اٹھی ہوئی تھیں۔ تب آپ (صلی اللہ علیہ وآلہ وسلم) نے پوچھا : فلاں اور فلاں کہاں ہیں ؟ دونوں بولے : ہم موجود ہیں یارسول اللہ ! آپ (صلی اللہ علیہ وآلہ وسلم) نے ارشاد فرمایا : نیچے اترو اور اس مردار گدھے کو کھاؤ۔ دونوں بولے : یا نبی اللہ ! اللہ آپ کی مغفرت کرے، اس کو کون کھائے گا ؟ آپ (صلی اللہ علیہ وآلہ وسلم) نے ارشاد فرمایا : تم نے جو ابھی اپنے بھائی کی آبروریزی کی وہ تو اس مردار کے کھانے سے زیادہ بری ہے۔ قسم ہے اس ذات کی جس کے ہاتھ میں میری جان ہے وہ تو ابھی جنت کی نہروں میں غوطے ماررہا ہے۔ الجامع لعبد الرزاق ، ابوداؤد
کلام : ضعیف ابی داؤد 952 ۔