١٣٥٧۔۔ محارب بن دثار ، حضرت عمر (رض) سے روایت کرتے ہیں کہ حضرت عمر (رض) نے فرمایا، ہم حضور کے پاس حاضر خدمت تھے کہ آپ کی خدمت میں ایک سفید لباس میں ملبوس ، عمدہ خوشبو میں بسا ہوا شخص حاضر ہوا، اور اس نے آکر اپنا ہاتھ حضور کے گھٹنوں پر رکھ کر بیٹھتے ہوئے کہا، ایمان کیا ہے، یارسول اللہ فرمایا یہ کہ تم اللہ پر یوم آخرت پر، ملائکہ پر کتاب اللہ پرا اور انبیاء پر ایمان لاؤ، نیز جنت اور جہنم پر ایمان لاؤ، اور اس بات پر ایمان لاؤ کہ تقدیر اچھی اور بری برحق ہے سائل نے عرض کیا اگر میں ایسا کرلوں تو کیا میں مومن ہوجاؤں گا، ؟ فرمایا بالکل۔ سائل نے کہا آپ نے سچ فرمایا۔ اس پر ہم کو تعجب ہوا کہ وہ شخص سائل ہونے کے باوجود آپ کی تصدیق کررہا ہے۔ سائل نے پھر سوال کیا اسلام کیا ہے ؟ آپ نے فرمایا یہ کہ تم نماز قائم کرو، زکوۃ ادا کرو، بیت اللہ کا حج کرو، ماہ صیام کے روزے رکھو، جنابت سے غسل کرو، سائل نے عرض کیا تو کیا میں ان افعال کی ادائیگی کے بعد مسلمان ہوجاؤں گا۔ فرمایا بالکل ۔ سائل نے پھر سوال کیا : احسان کیا چیز ہے ؟ فرمایا تم اللہ کے لیے یوں عمل کرو گویا کہ اسے دیکھ رہے ہو۔۔ پس اگر تم اسے نہیں دیکھ رہے وہ تویقینا تمہیں دیکھ ہی رہا ہے سائل نے کہا : آپ نے سچ فرمایا ۔ پھر سوال کیا، وقوع قیامت کب ہوگا ؟ فرمایا اس کے متعلق مسوئل سائل سے زیادہ علم نہیں رکھتا، سائل نے کہا، آپ نے سچ فرمایا، پھر سائل منہ موڑ کر چل دیا، آپ نے فرمایا سائل کو میرے پاس حاضر کرو اور اس کو تلاش کرو لیکن اصحاب رسول پر اس پر قادر نہ ہوسکے۔ تب آپ نے فرمایا، یہ جبرائیل (علیہ السلام) تھے تمہیں تمہارا دین سمجھانے آئے تھے اور سوائے اس مرتبہ کے اس سے قبل جب بھی کسی صورت میں میرے پاس تشریف لائے میں نے ان کو پہچان لیا۔ رسہ فی الایمان۔