١٣٥٨۔۔ عمر بن خطاب (رض) سے مروی ہے کہ ہم لوگوں کے ایک مجمع کے ساتھ رسول اکرم کے گردوپیش بیٹھے ہوئے تھے کہ اچانک ایساشخص حاضر مجلس ہوا جس پر نہ توآثار سفر تھے اور نہ ہی وہ اہل شہر میں سے تھا، وہ اہل مجلس کو عبور کرتا ہوا حتی کہ عین رسول اکرم کے سامنے آکر دوزانو بیٹھ گیا۔ جس طرح ہم میں سے کوئی نماز میں بیٹھتا ہے۔ اور پھر اپنے ہاتھ اپنے گھٹنوں پر رکھ دیے پھر کہا اے محمد ! اسلام کیا ہے ؟ آپ نے فرمایا، اسلام یہ ہے کہ تم اس بات کی شہادت دو ، کہ اللہ کے سوا کوئی پرستش کے لائق نہیں اور میں اللہ کا رسول ہوں نماز قائم کرو، زکوۃ ادا کرو، بیت اللہ کا حج وعمرہ کرو، جنابت سے غسل کرو، وضو کو تام کرو، ماہ صیام کے روزے رکھو، سائل نے عرض کیا، تو کیا میں ان افعال کی ادائیگی کے بعد مسلمان ہوجاؤں گا ؟ فرمایا بالکل ۔ سائل نے کہا، آپ نے سچ فرمایا اے محمد، پھر پوچھا ایمان کیا ہے۔ فرمایا یہ کہ تم اللہ پر اور اس کے ملائکہ پر کتابوں اور رسولوں پر ایمان لاؤ، نیز جنت جہنم اور میزان پر ایمان لاؤ۔ اور بعث بعد الموت پر ایمان لاؤ اور اچھی بری تقدیر پر ایمان لاؤ، سائل نے عرض کیا اگر میں ایسا کرلوں تو کیا میں مومن ہوجاؤ ں گا۔ ؟ فرمایا جی ۔ پھر کہا آپ نے سچ فرمایا، اللالکائی بخاری و مسلم فی البعث۔