13775 محمود بن لبید انصاری سے مروی ہے کہ حضرت عمر بن خطاب (رض) جب ملک شام تشریف لائے تو اہل شام نے وہاں کی سرزمین کی وباء اور اس کی سختی کا رونا رویا۔ اور بولے : اس وجہ سے ہم کو شراب ہی طبیعت کو درست رکھتی ہے۔ حضرت عمر (رض) نے فرمایا : تم شہد نوش کرو۔ بولے : یہ بھی ہمارے لیے درست نہیں رہتا۔ وہاں کے ایک باشندے نے عرض کیا : کیا ایسا مشروب صحیح ہے جو نشہ آور نہ ہو ؟ آپ (رض) نے اثبات میں ہاں فرمادی۔ چنانچہ کچھ لوگوں نے انگور کا شیرہ پکا کر اس کا دوتہائی ختم کردیا اور ایک تہائی باقی رہنے دیا۔ پھر اس کو لے کر حضرت عمر (رض) کی خدمت میں حاضر ہوئے۔ حضرت عمر (رض) نے اس میں انگلی ڈبو کر نکالی پھر بار بار اس میں انگلی ڈبو کر اس کا گاڑھا پن دیکھتے رہے۔ پھر فرمایا : یہ طلاء (نبیذ) ہے، یہ اونٹوں کے طلاء کے مثل ہے۔ پھر آپ (رض) نے اس کے پینے کی اجازت مرحمت فرمادی۔
حضرت عبادۃ بن الصامت نے عرض کیا : آپ اس کو حلال کررہے ہیں ؟ اللہ کی قسم ! حضرت عمر (رض) نے ارشاد فرمایا : ہرگز نہیں قسم بخدا ! اے اللہ میں ان کے لیے وہ شے حلال نہیں کررہا جو آپ نے ان کے لیے حرام کردی ہے اور آپ کو حلال کردہ شے کو ان پر حرام نہیں کررہا۔
موطا امام مالک، السنن للبیہقی