13841 ابوسعید خدری (رض) سے منقول ہے کہ فرماتے ہیں کہ ہم نبی اکرم (صلی اللہ علیہ وآلہ وسلم) کے پاس بیٹھے ہوئے تھے۔ آپ (صلی اللہ علیہ وآلہ وسلم) نے فرمایا : وفد عبدالقیس آگیا ہے۔ لیکن ہم نے دیکھا تو کچھ بھی نہ تھا۔ پھر ہم تھوڑی دیر ٹھہرے تھے کہ وہ لوگ آگئے۔ انھوں نے نبی اکرم (صلی اللہ علیہ وآلہ وسلم) پر سلام بھیجا۔ آپ (صلی اللہ علیہ وآلہ وسلم) نے ان سے دریافت فرمایا : کیا تمہارے پاس تمہاری کھجوروں یا زادراہ میں سے کچھ باقی ہے ؟ انھوں نے اثبات میں ہاں کی تو آپ (صلی اللہ علیہ وآلہ وسلم) نے دستر خوان بچھانے کا حکم دیا۔ دستر خوان بچھ گیا تو وفد والوں نے اپنی بچی کچھی کھجوریں دستر خوان پر ڈال دیں جو وہ اپنے ساتھ لائے تھے۔ نبی اکرم (صلی اللہ علیہ وآلہ وسلم) نے اپنے اصحاب کو (کھانے پر) جمع کیا۔ پھر (کھانے کے دوران کھجوروں کی اقسام پر بات چیت) فرمانے لگے : تم ان کھجوروں کو برنی کھجور کہتے ہو، یہ فلاں قسم ہے، یہ فلاں کھجور ہے۔ لوگ ہاں ہاں کرتے رہے۔ پھر آپ (صلی اللہ علیہ وآلہ وسلم) نے وفد کے ایک ایک آدمی کو ایک مقامی کے سپرد کردیا کہ وہ اس کو بطور مہمان گھر لے جائے۔ اس کے ساتھ ساتھ اس کو قرآن کی تعلیم دے اور نماز (روزہ) سکھائے۔ اس طرح وہ ایک ہفتہ وہاں مقیم رہے۔ پھر آپ (صلی اللہ علیہ وآلہ وسلم) نے ان کو بلایا تو دیکھا کہ وہ کافی سیکھ گئے ہیں اور سمجھ گئے ہیں۔ پھر آپ نے ان کو ایک دوسرے کے پاس تبدیل کردیا۔ اور ایک ہفتہ وہ اسی طرح مقیم رہے۔ پھر آپ نے ان کو دوبارہ بلوایا تو اب کے دیکھا کہ وہ بالکل درست پڑھنے لگے ہیں اور دین کو سمجھ گئے ہیں۔ انھوں نے عرض کیا : یارسول اللہ ! اب ہم کو ہمارے دیار کی اشتیاق بڑھ گئی ہے اور اللہ ہی بہتر جانتا ہے ہم (دین کی) کچھ سمجھ بوجھ بھی حاصل کرچکے ہیں۔ چنانچہ آپ (صلی اللہ علیہ وآلہ وسلم) نے ان کو فرمایا : اپنے وطنوں کو لوٹ جاؤ۔ پھر انھوں نے آپس میں بات کی کہ اگر ہم رسول اللہ (صلی اللہ علیہ وآلہ وسلم) سے ان مشروبات کے متعلق پوچھ لیں جو ہم اپنے علاقے میں پیتے ہیں تو بہتر ہوگا۔ چنانچہ وہ بولے : یارسول اللہ ! ہم کھجور (کے درخت) کو لے کر اس کو بڑا سوراخ کرکے اس میں کھجوریں ڈال دیتے ہیں پھر اس میں پانی ڈال دیتے ہیں جب وہ صاف ہوجاتا ہے تو تم اس کو نوش کرلیتے ہیں ؟ آپ (صلی اللہ علیہ وآلہ وسلم) نے پوچھا : اور کیا ؟ وہ بولے : اسی طرح ہم کدو لے کر اس میں کھجوریں ڈال دیتے ہیں پھر اس میں پانی ڈال دیتے ہیں۔ جب وہ پانی صاف ہوجاتا ہے تو ہم اس کو نوش کرتے ہیں ؟ آپ (صلی اللہ علیہ وآلہ وسلم) نے پوچھا : اور کیا ؟ وہ بولے : اور ہم یہ سبز رنگ کے گھڑے لیتے ہیں ان میں کھجوریں ڈال کر ان پر پانی ڈال دیتے ہیں جب وہ صاف ہوجاتا ہے تو ہم وہ پانی پیتے ہیں۔ آپ (صلی اللہ علیہ وآلہ وسلم) نے فرمایا : کدو کے برتن میں، کھجور کے تنے (یا جڑ میں) اور نہ سبز گھڑے میں نبیذ نہ بناؤ بلکہ ان مشکیزوں میں بنالو جن کے منہ بند کیے جاتے ہیں اگر ان میں (بھی نشہ کا) تم کو شبہ ہوجائے تو ان میں مزید پانی ڈالو۔ الجامع لعبد الرزاق