١٣٨٩۔۔ خلاس بن عمرو سے مروی ہے کہ فرمایا کہ ہم حضرت علی بن ابی طالب کے پاس بیٹھے ہوئے تھے کہ آپ کے پاس خزاعہ قبیلہ کا ایک شخص آیا اور کہنے لگا اے امیرالمومنین کیا آپ نے رسول اکرم سے اسلام کے بارے میں کچھ سنا ہے ؟ فرمایا ہاں میں نے رسول اکرم سے سنااسلام کی بناء چار چیزوں پر ہے صبر، یقین ، جہاد اور عدل پھر صبر کے چار شعبے ہیں شوق خوف ، زہد اور انتظار۔ جو جنت کا مشتاق ہواوہ شہوتوں سے کنارہ کش ہوگیا اور جس کو جہنم کا خوف دامن گیر ہواوہ محرمات کے ارتکاب سے باز آگیا۔ اور جس نے دنیا کی حقیقت کو دیکھ لیا اس پر دنیا کے مصائب آسان ہوگئے اور یہی زہد ہے اور جو موت کا منتظر ہوا امور خیر کی طرف سرعت رواں ہوا۔
اور یقین کے بھی چار شعبے ہیں ذہانت میں غور و فکر کرنا دانائی و حکمت کو سمجھنا اور عبرت انگیزی اختیار کرنا، اگلے لوگوں کی سنت اپنانا، سو جس نے ذہانت میں غورو سے کام لیا، حکمت و دانائی کو جان گیا اور جس نے حکمت و دانائی کو پالیا اس نے عبرت حاصل کرلی۔ اور جس نے عبرت حاصل کرلی سنت کا متبع ہوگیا۔ اور جس نے سنت کی اتباع کرلی وہ درحقیقت اولین میں شمار ہے اور جہاد کے بھی چار شعبے ہیں امربالمعروف نہی عن المنکر ، ہر کام میں سچائی اورفاسقین کے فسق سے بغض۔ سو جس نے معروف نیکی کا حکم دیا۔ اور اس نے مومنین کی پشت پناہی کی اور جس نے منکر وشنیع بات سے منع کیا اس نے منافق کی ناک میں مٹی ڈال دی۔ اور جس نے ہر کام میں سچائی اختیار کی اپنے پر پڑنے والی ذمہ داریوں سے عہدہ بڑا ہوا ، اور اس نے اپنے دین کی حفاظت کرلی۔ اور جس نے فاسقین سے ان کے فسق کی وجہ سے بغض رکھا اور اللہ ہی کے لیے غضب آلود ہوا اللہ اس کے لیے غضب ناک ہوا۔ عدل کے بھی چار شعبے ہیں گہری سوچ، علم کی فروانی ، احکام سے متعلق شریعت اور حلم وبردباری کی شادابی۔ سو جس نے گہرے غور تدبر سے کام لیا اور اس نے مجمل ولاینحل کی وضاحت حاصل کرلی۔ اور جس نے ذخیرہ علم کا محفوظ کرلیا اس نے احکام سے متعلق شرعیت کو جان لیا۔ اور جو حلم وبردباری کے شاداب باغ میں اتر اور وہ دین میں کامل رہا اور وہ لوگوں میں بھی ہنسی خوشی بسر کرے گا۔ الحلیہ۔
فرمایا کہ خلاس بن عمرو نے اس کو مرفوعا روایت کیا ہے اور حارث نے اس کو حضرت علی سے مرفوعا روایت کیا ہے اور قبیصہ بن جابر نے حضرت علی سے اپنے قول سے روایت کیا ہے اور علاء بن عبدالرحمن نے بھی حضرت علی سے اپنے قول کے ساتھ روایت کیا ہے۔