14054 ہمیں معمر نے زہری سے، انھوں نے کعب بن عبدالرحمن بن مالک سے انھوں نے اپنے والد عبدالرحمن سے روایت نقل کی ہے کہ حضرت معاذ بن جبل (رض) اپنی قوم کے جوانوں میں سے نوجوان، فیاض اور خوبصورت شخص تھے۔ کوئی چیز نہیں روک کر رکھتے تھے۔ حتیٰ کہ مقروض ہوتے چلے گئے اور قرض نے ان کا سارا مال احاطہ کرلیا۔ پھر وہ نبی اکرم (صلی اللہ علیہ وآلہ وسلم) کے پاس آئے تاکہ آپ (صلی اللہ علیہ وآلہ وسلم) ان کے قرضخواہوں سے ان کے لیے کچھ کمی کرنے کا مطالبہ کریں۔ لیکن پھر بھی قرضخواہوں نے اپنے قرض میں کسی کمی کرنے کا امکان مسترد کردیا۔ اگر وہ کسی کے لیے قرض چھوڑتے تو حضور کی وجہ سے معاذ بن جبل کا قرض ضرور چھوڑ دیتے۔ چنانچہ رسول اللہ (صلی اللہ علیہ وآلہ وسلم) نے معاذ (رض) کا سارا مال ان کے قرض میں فروخت کردیا (اور معاذ (رض)) بغیر کسی مال کے کھڑے کے کھڑے رہ گئے جب فتح مکہ کا سال ہوا تو حضور اکرم (صلی اللہ علیہ وآلہ وسلم) نے یمن کے ایک گروہ پر ان کو امیر بنا کر بھیجا تاکہ وہ اپنا نقصان بھی پورا کرسکیں۔ حضرت معاذ (رض) یمن میں امیر کے عہدے پر متمکن رہے اور یہ سب سے پہلے شخص ہیں جنہوں نے اللہ کے مال (بیت المال) میں تجارت کی۔ وہ اسی طرح کچھ عرصہ رہے حتیٰ کہ مالدار ہوگئے۔ اور نبی اکرم (صلی اللہ علیہ وآلہ وسلم) کی وافت بھی ہوگئی۔
جب یہ یمن سے واپس تشریف لائے تو حضرت عمر (رض) نے حضرت ابوبکر (رض) کو عرض کیا : آپ سے اس شخص کو بلوائیں اور جو اس کے گزر بسر کے لیے ضروری مال ہو وہ اس کے پاس چھوڑ دیں اور بقیہ سارا مال لے (کر بیت المال کے حوالے کر) دیں۔
حضرت ابوبکر (رض) نے ارشاد فرمایا : نہیں، حضور (صلی اللہ علیہ وآلہ وسلم) نے ان کو (یمن) اسی لیے بھیجا تھا کہ یہ اتنا نقصان پورا کرلیں، اس لیے میں ان سے کچھ نہیں لوں گا الایہ کہ یہ مجھے از خود دیدیں۔ چنانچہ حضرت عمر (رض) ، حضرت معاذ (رض) کے پاس ازخود گئے کیونکہ ابوبکر (رض) نے ان کی بات نہ مانی تھی۔ حضرت عمر (رض) نے حضرت معاذ (رض) سے یہ مطالبہ کیا۔ حضرت معاذ (رض) نے جواب دیا : مجھے رسول اللہ (صلی اللہ علیہ وآلہ وسلم) نے اسی لیے بھیجا تھا تاکہ میں اپنے نقصان کی تلافی کروں۔ لہٰذا میں ایسا نہیں کرسکتا۔
پھر حضرت معاذ (رض) نے حضرت عمر (رض) سے خود ملاقات کی اور بولے : میں آپ کی اطاعت کرتا ہوں۔ جو آپ نے مجھے حکم دیا تھا میں اس کو پورا کروں گا۔ میں نے خواب میں دیکھا تھا کہ میں پانی کے تالاب میں ڈوب رہا ہوں پھر آپ نے مجھے وہاں سے نکالا تھا اے عمر ! چنانچہ حضرت معاذ (رض) حضرت ابوبکر (رض) کے پاس حاضر خدمت ہوئے اور ان کو ساری بات سنائی اور حلف اٹھایا کہ وہ اپنے مال میں سے کچھ بھی نہ چھپائیں گے پھر انھوں نے اپنا سارا مال تفصیل سے بیان کردیا حتیٰ کہ اپنا کوڑا تک نہ چھوڑا۔ حضرت ابوبکر (رض) نے فرمایا : اللہ کی قسم ! میں تم کو جو ہبہ کر چکاہوں واپس ہرگز نہ لوں گا۔ حضرت عمر (رض) نے فرمایا : اب ان لے لینا حلال ہوچکا ہے کیونکہ یہ بخوشی دے رہے ہیں۔
پھر حضرت معاذ (رض) اپنا سارا مال اللہ کی راہ میں دے کر جہاد کی غرض سے ملک شام نکل گئے۔ معمر کہتے ہیں : مجھے قریش کے ایک شخص نے خبر دی کہ میں نے امام شہاب زہری (رح) سے سنا ہے کہ جب نبی اکرم (صلی اللہ علیہ وآلہ وسلم) نے معاذ (رض) کا مال قرض خواہوں کو فروخت کردیا تو پھر ان کو لوگوں کے برسرعام کھڑا کیا اور ارشاد فرمایا : جو شخص اس کو کوئی مال فروخت کرے وہ سودا باطل (کالعدم) ہے۔
الجامع لعبد الرزاق
ابن راھویہ