14058 عبداللہ بن عمرو بن العاص (رض) سے مروی ہے کہ حضرت ابوبکر صدیق (رض) جمعہ کے دن کھڑے ہوئے ارشاد فرمایا : اگلے روز صبح کو صدقات کے اونٹ حاضر کیے جائیں تاکہ ہم ان کو تقسیم کردیں۔ اور کوئی شخص بغیر اجازت (باڑے میں) ہمارے پاس نہ آئے۔ ایک عورت نے اپنے شوہر کو کہا : یہ اونٹ کی نکیل ڈالنے والی رسی لے لو شاید اللہ پاک ہم کو تقسیم میں کوئی اونٹ عنایت کردے۔ وہ آدمی رسی لے کر آیا ۔ اس وقت حضرت ابوبکر اور عمر (رض) اندر داخل ہوچکے تھے۔ چنانچہ آدمی بھی اندر چلا گیا۔ حضرت ابوبکر (رض) اس کی طرف متوجہ ہوئے پوچھا : تو کیوں آیا ہے ؟ پھر اس سے رسی لے کر اس کو مارا۔ پھر جب حضرت ابوبکر (رض) اونٹوں کی تقسیم سے فارغ ہوچکے تو اس آدمی کو بلوایا اور اس کی رسی اس کو دی اور فرمایا ایک اونٹ کو ہانک کرلے جا۔ حضرت عمر (رض) نے فرمایا : اللہ کی قسم ! اس طریقے کو رائج نہ ہونے دیں۔ حضرت ابوبکر (رض) نے فرمایا : پھر قیامت کے دن اللہ سے مجھے کون بچائے گا ؟ حضرت عمر (رض) نے فرمایا : آپ اس کو راضی کرلیں ۔ پھر حضرت ابوبکر (رض) نے ایک سواری کا اونٹ بمعہ کجاوہ لانے کا حکم دیا اور اس کے ساتھ ایک چادر اور پانچ دینار منگوائے اور یہ سارا مال اس آدمی کو دیدیا۔ اور اس کو خوش کردیا۔ السنن للبیہقی
ابن وھب نے اپنی جامع میں اس کا آخری حصہ نقل کیا ہے۔