14059 ابن اسحاق (رح) سے مروی ہے کہ خلافت کا بار اٹھانے والے دن حضرت ابوبکر (رض) نے اپنے خطبہ میں ارشاد فرمایا :
مسلمانوں کے لیے یہ حلال نہیں ہے کہ ان کے دو امیر ہوں (جیسا کہ انصار کی رائے ہے) کیونکہ اس صورت میں مسلمانوں کا معاملہ اختلاف کا شکار ہوجائے گا، ان کے احکام اور ان کی متحد جماعت منتشر ہوجائے گی۔ وہ آپس میں تنازعہ کریں گے۔ ایسی صورت میں سنت چھوٹ جائے گی بدعت ظاہر ہوجائے گی اور فتنہ غالب ہوجائے گا پھر کوئی شخص اس بگاڑ کو سدھارنہ دے سکے گا۔
اور یہ بار خلافت قریش میں رہے گا جب تک کہ وہ اللہ کی عبادت کرتے رہیں اور سیدھی راہ پر گامزن رہیں۔ یہ بات تم رسول اللہ (صلی اللہ علیہ وآلہ وسلم) سے سن چکے ہوگے۔ پس اب نزاع۔ اور جھگڑانہ کرو ورنہ تم کمزور اور بودے ہوجاؤ گے اور تمہاری ہوا نکل جائے گی۔ اور صبرکرو۔ بیشک اللہ صبر کرنے والوں کے ساتھ ہے۔ ہم (قریشی) امیر بنتے ہیں اور تم (انصاری) ہمارے وزیر بنو، دین میں ہمارے بھائی بنے رہو اور اس امر پر ہمارے مددگار بنے رہو۔
اس کے بعد حضرت عمر (رض) نے خطبہ ارشاد فرمایا : اے گروہ انصار ! میں تم کو اللہ کا واسطہ دیتا ہوں کیا تم نے رسول اللہ سے نہیں سنایا تم میں سے کسی نے سنا ہو کہ آپ (صلی اللہ علیہ وآلہ وسلم) نے ارشاد فرمایا :
الولاۃ من قریش مااطعوا اللہ واستقاموا علی امرہ
حکام قریش میں ہوں گے جب تک کہ وہ اللہ کی اطاعت کرتے رہیں اور اس کے دین پر ثابت قدم رہیں۔
تب انصار میں سے کچھ لوگوں نے کہا : ہاں اب ہم کو یاد آگیا ہے۔
پھر حضرت عمر (رض) نے ارشاد فرمایا : پس ہم بھی اس امارت و حکومت کو اسی حکم کی وجہ سے مانگتے ہیں، پس تم کو خواہشیں گمراہ نہ کردیں۔ پس حق آنے کے بعد پیچھے گمراہی ہی ہے پھر تم کہاں بھٹکے جارہے ہو۔ السنن للبیہقی