14062 حضرت حسن (رض) سے مروی ہے کہ حضرت ابوبکرصدیق (رض) نے (جب خلافت کی ذمہ داری اٹھالی تو) خطبہ دیا اللہ کی حمدوثناء بجا لائے پھر فرمایا :
عقل مندوں میں سے بھی عقل مند ترین وہ شخص ہے جو تقویٰ اختیار کرنے والا ہے اور نادانوں کا نادان ہے جو فجور و معاصی میں منہمک ہے۔ دیکھو سچ میرے ہاں امانت ہے اور کذب خیانت ہے۔ یاد رکھو ! طاقت ور میرے لیے کمزور ہے جب تک کہ میں اس سے حق وصول نہ کرلوں۔ اور ضعیف میرے نزدیک قوی و طاقت ور ہے جب تک کہ اس کا حق ادا نہ دلوادوں۔ آگا رہو ! میں تم پر والی (حاکم) بنا ہوں، لیکن میں تم سے بہتر نہیں ہوں۔ میری تمنا ہے کہ تم میں سے کوئی شخص میری جگہ اس کام کے لیے عہدہ برآ ہوجائے۔ اللہ کی قسم ! اگر تمہارا خیال ہو کہ اللہ نے جس طرح اپنے نبی کو وحی کے ساتھی مضبوط رکھا میں بھی اسی طرح عمل دکھاؤں۔ تو میں محض ایک بشر ہوں تم میرا خیال رکھو۔
حضرت حسن (رض) فرماتے ہیں : جب اگلا روز ہوا تو آپ بازار کی طرف چل دیئے۔ حضرت عمر (رض) نے ان سے پوچھا : کہاں جارہے ہو ؟ فرمایا : بازار۔ حضرت عمر (رض) نے عرض کیا : اب آپ پر ایسی ذمہ داری عائد ہوگئی ہے جو آپ کو اس بازار کے کاروبار سے دور رکھنا چاہتی ہے۔ حضرت ابوبکر (رض) نے فرمایا : سبحان اللہ ! کیا یہ ذمہ داری مجھے اپنے اہل و عیال کی ذمہ داری سے دور کردے گی ؟ حضرت عمر (رض) نے عرض کیا : ہم آپ کے لیے قاعدے کے مطابق وظیفہ (تنخواہ) مقرر کردیتے ہیں۔ حضرت ابوبکر (رض) نے فرمایا : افسوس اے عمر ! مجھے خوف ہے کہ کہیں مجھے (بیت المال کا) مال لینے کی گنجائش نہ ہو۔
پھر آپ (رض) (کا مسلمانوں نے وظیفہ طے کردیا) اور آپ (رض) نے دو سال سے کچھ اوپر (مدت خلافت میں) صرف آٹھ ہزار درہم (بیت المال کے اپنی تنخواہ کی مد میں) خرچ کیے ۔ لیکن جب ان کی موت کا وقت سر پر آیا تو فرمانے لگے : میں نے تو عمر کو کہا تھا کہ یہ مال مجھے لینا درست نہ ہوگا لیکن وہ اس وقت مجھ پر غالب آگئے۔ پس جب میں مرجاؤں تو میرے ذاتی مال میں سے آٹھ ہزار درہم بیت المال میں لوٹا دینا۔ چنانچہ جب وہ مال حضرت عمر (رض) کے پاس پیش کیا گیا تو انھوں نے فرمایا : اللہ ابوبکر پر رحم فرمائے، انھوں نے اپنے بعد والوں کو سخت مشقت میں ڈال دیا۔
السنن للبیہقی