14063 میمون بن مہران سے مروی ہے کہ حضرت ابوبکر (رض) کے پاس جب کوئی قضیہ (کیس) آتا تو آپ پہلے کتاب اللہ میں دیکھتے اگر اس میں اس کا حل پاتے تو اس کے ساتھ فیصلہ فرما دیتے۔ اگر کتاب اللہ میں اس کا فیصلہ نہ پاتے تو دیکھتے کہ کیا نبی (صلی اللہ علیہ وآلہ وسلم) کا کوئی عمل اس جیسے قضیے میں پیش آیا ہے۔ اگر ایسا کوئی فیصلہ سنت نبوی میں ہوتا تو اس کے مطابق فیصلہ فرما دیتے۔ اگر ایسا کوئی مسئلہ معلوم نہ ہوتا تو باہر نکلتے اور مسلمانوں سے سوال کرتے اور فرماتے : میرے پاس ایسا ایسا مسئلہ آیا ہے، میں نے کتاب اللہ اور سنت رسول اللہ میں دیکھا مگر میں نے اس بارے میں کچھ نہ پایا کیا تم کو معلوم ہے کہ نبی اکرم (صلی اللہ علیہ وآلہ وسلم) نے ایسے مسئلہ میں کیا فیصلہ فرمایا ہے ؟ پھر بسا اوقات تو پوری جماعت کھڑی ہوجاتی اور کہتی : ہاں یہ یہ فیصلہ آپ (صلی اللہ علیہ وآلہ وسلم) نے فرمایا ہے۔ تب حضرت ابوبکر صدیق (رض) سنت رسول کے مطابق فیصلہ نافذ فرما دیتے اور ارشاد فرماتے : تمام تعریفیں اللہ کے لیے ہیں جس نے ہمارے اندر ایسے لوگ بنادیئے جنہوں نے ہمارے نبی کے فرمان کو محفوظ رکھا۔ اگر اس طرح بھی مسئلہ حل نہ ہوتا تو مسلمانوں کے سرداروں اور علماء کو بلا کر ان سے مشاورت فرماتے۔ جب ان کی رائے کسی مسئلے پر جمع ہوجاتی تو اس کے ساتھ فیصلہ فرما دیتے۔ حضرت عمر بن خطاب (رض) اپنے عہد خلافت میں ایسا کوئی مسئلہ پاتے کہ جس میں کتاب اللہ اور سنت رسول سے راہنمائی نہ ملتی تو حضرت ابوبکر (رض) کے فیصلہ جات کو دیکھتے اگر ابوبکر (رض) نے اس بارے میں کوئی فیصلہ فرمایا ہوتا تو اس کے ساتھ فیصلہ فرما دیتے ورنہ پھر مسلمانوں کے سرداروں اور علماء کو بلا کر مشاورت فرماتے اور جب ان کی رائے کسی مسئلے پر مجتمع ہوجاتی تو اس کے ساتھ فیصلہ فرما دیتے۔
سنن الدارمی، السنن للبیہقی