14064 حضرت انس (رض) سے مروی ہے کہ جب سقیفہ میں حضرت ابوبکر (رض) کی بیعت کرلی گئی اور آئندہ روز حضرت ابوبکر (رض) منبر پر بیٹھے تو حضرت عمر (رض) اپنی جگہ سے اٹھے اور حضرت ابوبکر (رض) سے پہلے بولے : اللہ کی حمدوثناء کی پھر فرمایا :
اے لوگو ! گزشہت کل میں نے ایک بات کہی تھی جو میں نے قرآن میں دیکھی تھی اور نہ نبی (صلی اللہ علیہ وآلہ وسلم) نے مجھے فرمائی تھی۔ بلکہ میرا ذاتی خیال تھا کہ ابھی تو رسول اللہ (صلی اللہ علیہ وآلہ وسلم) ہمارے معاملات کو منظم فرمائیں گے۔
پس اب اللہ تعالیٰ نے تمہارے اندر اپنی کتاب چھوڑ دی ہے۔ جو رسول اللہ (صلی اللہ علیہ وآلہ وسلم) کا راستہ ہے۔ اگر تم نے اس کو مضبوطی سے تھام لیا تو اللہ تم کو بھی ہدایت سے نوازدے گا جس طرح اپنے پیغمبر کو سیدھی راہ دکھائی تھی۔ اللہ تعالیٰ نے تمہارے امور سلطنت ایسے شخص کو سونپ دیئے ہیں جو تم میں سب سے بہتر ہے، رسول اللہ (صلی اللہ علیہ وآلہ وسلم) کا ساتھی ہے، ثانی اثنین اذھما فی الغار آپ (صلی اللہ علیہ وآلہ وسلم) کا یارغار ہے۔ اٹھو اور ان کی بیعت کرو۔ چنانچہ بیعت سقیفہ کے بعد یہ عام بیعت ہوئی جو (سب) لوگوں نے کی۔
پھر حضرت ابوبکر (رض) نے خطبہ ارشاد فرمایا : پہلے اللہ کی حمدوثناء کی پھر فرمایا :
اے لوگو ! مجھے تمہارا والی (حاکم) بنایا گیا ہے حالانکہ میں تم سے بہتر نہیں ہوں۔ اگر میں اچھا کروں تو میری مدد کرو، اگر برا کروں تو مجھے سیدھا کردو۔ سچائی امانت ہے جھوٹ خیانت ہے۔ تمہارا ضعیف میرے نزدیک قوی ہے حتیٰ کہ میں اس کا حق دلادوں انشاء اللہ۔ تمہارا قوی میرے لیے ضعیف ہے جب تک کہ میں اس سے (حق والے کا) حق نہ لے لوں (یادرکھو ! ) کوئی قوم جہاد کو نہیں چھوڑتی مگر اللہ پاک ان پر ذلت مسلط کردیتا ہے۔ کسی قوم میں فحش کام عام نہیں ہوتے مگر اللہ پاک ان کو عمومی مصائب وآفات میں مبتلا فرما دیتا ہے تم میری اطاعت کرتے رہو جب تک کہ میں اللہ اور اس کے رسول کی اطاعت کرتا رہوں، جب میں اللہ اور اس کے رسول کی نافرمانی میں مبتلا ہوجاؤ تو تم پر میری اطاعت نہیں۔ پس اب نماز کے لیے اٹھ کھڑے ، اللہ تم پر رحم کرے۔ ابن اسحاق فی السیرۃ امام ابن کثیر (رح) فرماتے ہیں : اس کی اسناد صحیح ہے۔