14079 ابوسعید الخدری (رض) سے مروی ہے کہ جب رسول اللہ (صلی اللہ علیہ وآلہ وسلم) کی وفات ہوگئی تو انصار کے خطباء کھڑے ہوئے اور ان میں سے ایک آدمی کہنے لگا : اے گروہ مہاجرین ! رسول اکرم (صلی اللہ علیہ وآلہ وسلم) جب تم میں سے کسی آدمی کو امارت کی کوئی ذمہ داری سونپتے تھے تو اس کے ساتھ ایک آدمی ہمارا بھی ملا دیتے تھے۔ لہٰذا ہمارا خیال ہے کہ اب امارت کے بھی دو آدمی والی بنیں ایک تم میں سے اور ایک ہم میں سے۔ چنانچہ انصار کے دوسرے مقررین بھی اسی بات کا اصرار کرنے لگے۔ پھر حضرت زید بن ثابت (جو انصاری صحابی ہی تھے) کھڑے ہوئے اور ارشاد فرمایا : رسول اللہ (صلی اللہ علیہ وآلہ وسلم) مہاجرین میں سے تھے اور امام بھی مہاجرین میں سے ہوگا اور ہم اس کے مددگار بنیں گے ۔ جس طرح ہم پہلے رسول اللہ (صلی اللہ علیہ وآلہ وسلم) کے (انصار) مددگار تھے۔ پھر حضرت ابوبکر (رض) کھڑے ہوئے اور فرمایا : جزاکم اللہ یا معشر الانصار خیر اوثبت قائلکم، اے گروہ انصار اللہ تم کو اچھا بدلہ عطا فرمائے اور تمہارے کہنے والے کو ثابت قدم رکھے۔ پھر آپ (رض) نے ارشاد فرمایا : اگر تم اس کے علاوہ کوئی کام کرو گے (مثلاً دو امیروں والی بات) تو ہم ہرگز تمہارے ساتھ صلح نہ کریں گے۔ پھر حضرت زید بن ثابت (رض) نے حضرت ابوبکر (رض) کا ہاتھ پکڑ کر لوگوں کو ارشاد فرمایا : یہ تمہارے ساتھ ہیں ان کی بیعت کرلو۔ پھر لوگ چل پڑے۔ اور حضرت ابوبکر (رض) نے منبر پر بیٹھ کر لوگوں کے چہروں کی طرف دیکھا لیکن۔ ان بیعت کرنے والوں میں حضرت علی (رض) نظر نہ آئے۔ ان کے متعلق پوچھا تو انصاری حضرات جاکر ان کو لے آئے۔ حضرت ابوبکر (رض) نے فرمایا : اے رسول اللہ (صلی اللہ علیہ وآلہ وسلم) کے چچا کے بیٹے اور ان کے داماد ! کیا تم مسلمانوں کی۔ بنی ہوئی لاٹھی کو توڑنا چاہتے ہو۔ جو بیعت کرنے نہیں آئے حضرت علی (رض) نے فرمایا : اے خلیفہ رسول اللہ ! بیعت کرنے میں کوئی حرج نہیں ہے۔ چنانچہ حضرت علی (رض) نے بھی آپ کی بیعت کرلی۔ پھر حضرت ابوبکر (رض) کو زبیر بن العوام بھی نظر نہ آئے۔ ان کے متعلق پوچھا تو لوگ ان کو بھی لے آئے۔ ابوبکر (رض) نے ان کو فرمایا : اے رسول اللہ کی پھوپھی کے بیٹے ! اے رسول اللہ کے حواری۔ ساتھی کیا تو مسلمانوں کی لاٹھی توڑنا چاہتا ہے ؟ انھوں نے بھی حضرت علی (رض) کے مثل جواب دیا کہ کوئی حرج نہیں۔ بیعت میں پھر انھوں نے بھی بیعت کرلی۔
ابوداؤد، ابن سعد، مصنف ابن ابی شیبہ، ابن جریر، السنن للبیہقی، مستدرک الحاکم، ابن عساکر