14080 سہل بن ابی حثمہ اور صبیحۃ تیمی اور جبیر بن الحویرث اور ھلال سے مروی ہے سب حضرات کے کلام کا خلاصہ ہے کہ حضرت ابوبکر صدیق (رض) کا بیت المال سخ میں تھا اور مشہور تھا۔ اس کے باوجود اس کی حفاظت کوئی نہ کرتا تھا۔ حضرت ابوبکر صدیق (رض) کو کسی نے کہا : اے خلیفہ رسول اللہ ! آپ بیت المال پر کسی کو چوکیدار کیوں نہیں مقرر کرتے ؟ حضرت ابوبکر (رض) نے فرمایا : نہیں، اس پر کا ہے کا خوف ! راوی نے کہا : میں نے عرض کیا : وہ کیوں (خوف کیوں نہیں ؟ ) فرمایا : اس پر تالا لگا ہوا ہے۔ حضرت ابوبکر صدیق (رض) اس میں مال دیتے رہتے تھے حتیٰ کہ کچھ باقی نہ بچتا تھا۔ جب حضرت ابوبکر (رض) مدینہ منتقل ہوگئے تو بیت المال بھی اسی گھر میں بنوالیا جہاں آپ رہائش پذیر تھے۔ آپ کے پاس قبیلہ اور جہینہ کی کانوں سے بہت مال آتا تھا نیز بنی سلیم کی معدن بھی خلافت ابی بکر میں کھل گئی تھی۔ چنانچہ اس کی زکوۃ بھی آئی۔ آپ (رض) سارا مال بیت المال میں رکھوادیا کرتے تھے۔ اور پھر اس کو لوگوں میں گروہ گروہ بنا کر تقسیم کرتے تھے۔ چنانچہ ہر سو آدمیوں کو ایک خاص حصہ دیدیتے تھے۔ اور مال کی تقسیم میں آزاد ، غلام، مرد ، عورت اور چھوٹے بڑے سب کو برابر رکھتے تھے۔ نیز آپ اونٹ گھوڑوں اور اسلحہ کو خرید لیتے تھے پھر ان کو جہاد فی سبیل اللہ میں کام لاتے تھے۔ ایک سال آپ نے دیہات سے لائی جانے والی چادریں خرید لیں۔ اور ان کو سردیوں میں مدینہ کے فقیر مسکینوں میں تقسیم کردیا۔ جب حضرت ابوبکر (رض) کی وفات ہوگئی اور ان کو دفن کردیا گیا تو حضرت عمر (رض) نے امناء (منشیوں) کو بلایا اور ان کے ساتھ حضرت ابوبکر (رض) کے بیت المال میں تشریف لے گئے۔ آپ کے ساتھ عبدالرحمن بن عوف اور عثمان بن عفان بھی تھے۔ جب ان لوگوں نے بیت المال کھولا تو اس میں کوئی دینار ملا اور نہ درہم۔ ہاں ایک ہلکا سا کپڑا پڑا تھا اس کو جھاڑا گیا تو اس میں سے ایک درہم گرا۔ تب ان حضرات کو حضرت ابوبکر (رض) پر بہت ترس اور رحم آیا۔ مدیہ میں ایک وزان ۔ ناپ تول کرنے والا تھا جو عہد رسول اللہ (صلی اللہ علیہ وآلہ وسلم) کے زمانے میں بھی یہی کام کرتا تھا اور حضرت ابوبکر (رض) کے بیت المال کی ناپ تول کرنے والا بھی یہی شخص تھا اس سے پوچھا گیا کہ ابوبکر (رض) کے پاس جو مال آیا وہ کل ملا کر کس قدر ہوگا ؟ اس نے کہا دو لاکھ درہم ۔ لیکن آپ نے سب کا سب اللہ کی راہ میں غریب غرباء میں تقسیم فرماتے رہے اور سب کو جیسا کہ پیچھے گزرا برابر حصہ دیتے رہے۔
ابن سعد