14123 حمید بن عبدالرحمن حمیری سے رسول اللہ (صلی اللہ علیہ وآلہ وسلم) کی وفات ہوئی تو ابوبکر (رض) مدینے کی ایک جماعت کے ہمراہ تھے۔ حضرت ابوبکر (رض) نے آکر آپ (صلی اللہ علیہ وآلہ وسلم) کا چہرہ کھولا اور فرمایا : آپ پر میرے ماں باپ قربان ہوں، آپ کی زندگی اور موت دونوں کس قدر عمدہ تھیں۔ رب کعبہ کی قسم ! محمد کی وفات ہوگئی ہے۔
پھر ابوبکر (رض) اور عمر (رض) دونوں ایک دوسرے کو کھینچتے ہوئے لوگوں کے پاس پہنچ گئے۔ پہلے حضرت ابوبکر (رض) نے لوگوں سے خطاب کیا اور ایسی کوئی بات نہ چھوڑی جو انصار کے متعلق قرآن میں نازل ہوئی ہو یارسول اللہ (صلی اللہ علیہ وآلہ وسلم) نے ان کی شان میں ذکر کی ہو بلکہ اس کو لوگوں کے آگے ذکر فرمادیا اور ارشاد فرمایا : تم جانتے ہو کہ رسول اللہ (صلی اللہ علیہ وآلہ وسلم) نے ارشاد فرمایا تھا : اگر لوگ ایک وادی میں چل پڑیں جبکہ انصار دوسری وادی کی طرف چل دیں تو میں انصار کی وادی میں چلوں گا۔ اور اے سعد ! تو خوب جانتا ہے کیونکہ تم اس وقت وہاں بیٹھے ہوئے تھے جب رسول اللہ (صلی اللہ علیہ وآلہ وسلم) نے ارشاد فرمایا :
قریش اس حکومت کے والی ہوں گے ۔ پس لوگوں میں سے نیک لوگ ان کے نیکوں کے تابع ہوتے ہیں اور بدکار لوگ ان کے بدوں کے پیچھے۔ حضرت سعد (رض) نے فرمایا : (اے ابوبکر ! ) تم سچ کہتے ہو ، ہم وزراء ہوں گے اور تم امراء۔ مسند احمد، ابن جریر
فائدہ : یہ حدیث حسن ہے ، اگرچہ اس میں انقطاع ہے کیونکہ حمید بن عبدالرحمن بن عوف نے خلافت صدیق کا عرصہ نہیں پایا۔ ممکن ہے انھوں نے یہ روایت اپنے والد یا کسی اور صحابی سے روایت کی ہو۔ اور یہ ان کے درمیان مشہور ہے۔