14124 حضرت ابوسعیدخدری (رض) سے مروی ہے کہ جب حضرت ابوبکر صدیق (رض) کی بیعت کی گئی تو انھوں نے پوچھا : ” این علی لا ارا “ علی کہاں ہیں مجھے نظر نہیں آرہے ۔ لوگوں نے کہا : وہ آئے نہیں ہیں۔ حضرت ابوبکر (رض) نے دوبارہ پوچھا : اور زبیر کہاں ہیں ؟ لوگوں نے مثل سابق جواب دیا : وہ بھی نہیں آئے۔ حضرت ابوبکر (رض) نے فرمایا : میرا گمان تو یہ تھا کہ یہ بیعت تمام مسلمانوں کی رضامندی سے ہورہی ہے۔ یہ بیعت پرانے کپڑے کی خریدو فروخت نہیں ہے۔ اس بیعت سے انکار کی کسی کو گنجائش ممکن نہیں ہے۔
چنانچہ حضرت علی (رض) تشریف لے آئے۔ حضرت ابوبکر (رض) نے پوچھا : اے علی ! اس بیعت سے کس بات نے تجھے تاخیر میں ڈالا ؟ حضرت علی (رض) نے عرض کیا : میرا خیال تھا کہ میں حضور اقدس (صلی اللہ علیہ وآلہ وسلم) کا چچا زاد ہوں اور ان کی دختر نیک کا شوہر بھی، اس لیے آپ کا خیال بھی ہوگا کہ اس معاملے میں میرا حق آپ سے پہلے تھا۔ پھر حضرت علی (رض) نے فرمایا : لیکن اے خلیفہ رسول اللہ ! مجھے آپ قصور وار نہ ٹھہرائیں، لائیے ہاتھ ! چنانچہ پھر حضرت علی (رض) نے حضرت ابوبکر (رض) کی بیعت کرلی۔ پھر زبیر (رض) تشریف لائے تو ان سے بھی حضرت ابوبکر (رض) نے پوچھا : آپ کو بیعت کرنے میں دیر کیوں ہوئی ؟ حضرت زبیر (رض) نے جواب دیا میں رسول اللہ (صلی اللہ علیہ وآلہ وسلم) کی پھوپھی کا بیٹا اور آپ (صلی اللہ علیہ وآلہ وسلم) کا حواری ہوں۔ کیا آپ کو علم نہیں تھا کہ اس چیز میں میرا حق آپ سے پہلے تھا۔ لیکن پھر بھی آپ مجھے قصور وار نہ ٹھہرائیں، اے خلیفہ رسول اللہ ! چنانچہ انھوں نے بھی اپنا ہاتھ پھیلا دیا اور حضرت ابوبکر (رض) کی بیعت کرلی۔ السحاملی
فائدہ : امام ابن کثیر (رح) فرماتے ہیں : اس روایت کی سند صحیح ہے۔