14125 حصین بن عبدالرحمن بن عمرو بن سعد بن معاذ سے مروی ہے کہ دس ہجری کو رسول اللہ (صلی اللہ علیہ وآلہ وسلم) (حجۃ الوداع کا) حج کرکے مکہ سے واپس لوٹے مدینہ آکر ٹھہرگئے۔ حتیٰ کہ آپ (صلی اللہ علیہ وآلہ وسلم) نے گیارہ ہجری کے سال کے ماہ محرم کا چاند دیکھا۔ پھر آپ (صلی اللہ علیہ وآلہ وسلم) نے زکوۃ وصول کرنے والے کارندوں کو عرب علاقوں میں بھیجا۔ چنانچہ اس ذیل میں قبیلہ اسد اور طی کی طرف عدب بن حاتم (طائی) کو بھیجا۔ عدی (حضور کی وفات کے بعد) حضرت ابوبکر (رض) کے پاس تیس اونٹ زکوۃ کے لے کر آئے۔ اور ان کو حضرت ابوبکر (رض) کے حوالے کرتے ہوئے عرض کیا : اے خلیفہ رسول اللہ ! آج آپ کو ان کی حاجت ہے جبکہ میں ان کی طرف سے غنی اور مالدار ہوں۔ حضرت ابوبکر (رض) نے فرمایا : اے (نیک) مرد ! تو ہی ان کو لے لے۔ کیونکہ میں نے رسول اللہ (صلی اللہ علیہ وآلہ وسلم) کو ارشاد فرماتے ہوئے سنا تھا جب وہ تم سے معذرت کررہے تھے کہ تو واپس لوٹے گا اور خیر (مال تیرے ساتھ) ہوگا۔ پس (اے حاتم ! ) تو واپس بھی لوٹا اور اللہ کا مال بھی لایا۔ اب میں وہ وعدہ پورا کررہا ہوں جو رسول اللہ (صلی اللہ علیہ وآلہ وسلم) نے اپنی زندگی میں کیا تھا۔ لہٰذا پھر آپ (رض) نے (وہ اونٹ عدی کو دے کر وہ) وعدہ پورا کردیا۔ حضرت عدی (رض) نے عرض کیا : ہاں اب میں ان کو لے سکتا ہوں کیونکہ اب یہ رسول اللہ (صلی اللہ علیہ وآلہ وسلم) کی طرف سے میرے لیے عطیہ ہے۔ حضرت ابوبکر (رض) نے فرمایا پس لے جا۔ ابن سعد، ابن عساکر