14134 ابن عباس (رض) سے مروی ہے کہ حضرت عمر بن خطاب (رض) نے ارشاد فرمایا : ہماری خبر یہ ہے کہ جب رسول اللہ (صلی اللہ علیہ وآلہ وسلم) کی وفات ہوگئی تو انصار نے ہماری مخالفت کی اور سب کے سب انصار سقیفہ بنی ساعدہ میں اکٹھے ہوگئے۔ نیز علی اور زبیر نے بھی ہماری مخالفت کرنے والوں کے ساتھ مخالفت کی۔ جبکہ عامۃ المہاجرین اکٹھے ہو کر حضرت ابوبکر صدیق (رض) کے پاس اکٹھے ہوگئے اور ان کو عرض کیا : اے ابوبکر ! آپ ہمارے ساتھ ہمارے انصاری بھائیوں کے پاس چلیں۔ چنانچہ ہم انصار سے ملاقات کی غرض سے چل پڑے۔ جب ہم ان کے قریب پہنچے تو اس کے دو صلح پسند لوگ ہم سے ملے اور ان کی قوم جس طرف جھک گئی تھی انھوں نے اس کو ہم کو خبر دی۔ انھوں نے پہلے ہم سے پوچھا : اے جماعت مہاجرین ! کہاں چلے جارہے ہو ؟ ہم نے کہا : ہم اپنے ان انصاری بھائیوں کے پاس جارہے ہیں۔ اب تمہارا جانا ضروری نہیں رہا تم اپنا فیصلہ خود کرسکتے ہو۔ حضرت عمر (رض) فرماتے ہیں : میں نے کہا : اللہ کی قسم ! ہم ان کے پاس ضرور جائیں گے۔ چنانچہ ہم چل پڑے اور سقیفہ بنی ساعدۃ میں انصار کے پاس پہنچ گئے۔ وہاں ان کے درمیان ایک شخص چادر اوڑھے۔ سب سے نمایاں تھا میں نے پوچھا : یہ کون ہے ؟ لوگوں نے بتایا : یہ سعد بن عبادۃ ہے۔ میں نے پوچھا : اس کو کیا ہوگیا : لوگوں نے کہا : اس کو بخار آرہا ہے۔ پھر ہم تھوڑی دیر بیٹھے تو ان کا خطیب خطبہ دینے اٹھا اور اس نے اللہ ورسول کی شہادت دی، اللہ کی حمدوثناء بیان کی جو اس کی شان ہے۔ پھر بولا :
امابعد ! ہم ” انصار اللہ “ ہیں ، اللہ کے مددگار اور اسلام کے جھنڈے اور اے جماعت مہاجرین تم ہم میں سے ایک جماعت ہو۔ تمہارے کچھ لوگ اپنی راہ چلے ہیں، جن کا ارادہ ہے کہ صرف وہی اس منصب پر قابض ہوجائیں اور ہم کو نکال باہر کریں۔ حضرت عمر (رض) فرماتے ہیں : میں نے بولنا چاہا اور اپنی بات کو سانچے میں ڈھالا تو مجھے یہ بات عجیب لگی کہ ابوبکر کے آگے میں اس کو پیش کروں۔ میں نے کچھ اچھی باتیں سوچ رکھی تھیں جن کو میں نے بولنا چاہا تو حضرت ابوبکر (رض) نے مجھے فرمایا : ذرا ٹھہر جا۔ چنانچہ میں نے بھی ابوبکر (رض) کو غصہ دلانا مناسب نہ سمجھا۔ پھر حضرت ابوبکر (رض) نے بات شروع کی وہ مجھ سے زیادہ علم والے اور صاحب وقار نکلے۔ اللہ کی قسم ! میں نے جو بات بھی بولنے کے لیے بنائی تھی اور مجھے اچھی لگی تھی ابوبکر نے بلا تکلیف وہی بات یا اس سے اچھی بات پیش کی۔ حتیٰ کہ آپ (رض) نے فرمایا :
اے انصار تم نے تو خیر کی بات اپنے لیے ذکر کی ہے واقعی تم اس کے اہل ہو۔ لیکن ہم حکومت کا حق اس قبیلہ قریش کے لیے سمجھتے ہیں۔ یہ عرب میں نسب اور مقام کے اعتبار سے اوسط العرب ہیں۔ جن سے تمام عرب کی شاخیں ملتی ہیں۔ اور میں تمہارے واسطے اس منصب پر دو آدمیوں سے مطمئن اور راضی ہوں۔ تم ان دونوں میں سے جس کی چاہو بیعت کرلو۔ پھر حضرت ابوبکر (رض) نے میرا ہاتھ پکڑا اور ابوعبیدۃ بن الجراح کا ہاتھ پکڑا ، وہ بھی مجلس میں موجود تھے۔
مجھے حضرت ابوبکر (رض) کی ارشاد کردہ کوئی بات ناگوار محسوس نہ ہوئی۔ سوائے اس آخری بات کے۔ میں نے کہا : اللہ کی قسم مجھے آگے لا کر میری گردن اڑادی جائے بغیر کسی گناہ کے، یہ مجھے زیادہ محبوب ہے اس بات سے کہ میں ایسی قوم پر امیر بنوں جن کے درمیان ابوبکر موجود ہوں۔ واللہ ! ان کی موت کے وقت میرا نفس مجھے گمراہ کردے تو اور بات ہے ، مگر اب میں ایسی کوئی بات محسوس نہیں کرتا۔
انصار میں سے ایک کہنے والے نے کہا : میں اس مسئلے کا حل پیش کرتا ہوں جو سب کے لیے خوشگوار ہوگا۔ ایک امیر ہم میں سے ہوجائے اور ایک امیر تم میں سے اے جماعت قریش ! یہ کہنا تھا کہ شوروغوغا بلند ہوگیا اور آوازیں بلند ہونے لگیں۔ حضرت عمر (رض) فرماتے ہیں تب مجھے خطرہ محسوس ہوا کہ کہیں اختلاف کا بیج نہ پڑجائے، لہٰذا میں نے کہا : اے ابوبکراپنا ہاتھ لائیے۔ انھوں نے اپنا ہاتھ دیا تو میں نے ان کی بیعت کرلی اور دوسرے مہاجرین نے بھی بیعت کرلی پھر انصار نے بھی بیعت کرلی۔ پھر ہم سعد بن عبادہ پر لپکے۔ ایک انصاری نے کہا : تم سعد کو قتل کرو گے کیا ؟ میں نے کہا سعد کو تو اللہ قتل کرے گا۔ اللہ کی قسم اس صورت حال میں ہم نے ابوبکر کی بیعت سے بڑھ کر کوئی موافق صورت نہ پائی۔ ہمیں ڈر تھا کہ اگر ہم تم سے جدا ہوگئے اور کسی کی بیعت نہ کی تو تم ہمارے جانے کے بعد کوئی اور بیعت کر اوگے۔ اب یا تو ہم ان کی بیعت کرتے جو ہماری مرضی کے خلاف تھا یا ہم ان کی مخالفت کرتے تو فساد پیدا ہوتا۔ پس اب سن لو جس نے مسلمانوں کے مشورہ کے بغیر کسی کی بیعت کی اس کی کوئی بیعت نہیں اور نہ اس کی کوئی اہمیت جس کی بیعت کی جائے، ایسے دونوں بیعت کرنے اور کرانے والے کو قتل کیا جاسکتا ہے۔
مسند احمد، البخاری، ابوعبید فی الغرائب، السنن الکبری للبیہقی