14135 سالم بن عبید (رض) جو اصحاب صفہ میں سے تھے سے مروی ہے کہ حضرت ابوبکر (رض) رسول اللہ (صلی اللہ علیہ وآلہ وسلم) کے پاس حاضر تھے۔ آپ (رض) سے پوچھا گیا : اے رسول اللہ (صلی اللہ علیہ وآلہ وسلم) کے ساتھی ! کیا رسول اللہ (صلی اللہ علیہ وآلہ وسلم) کا انتقال ہوگیا ہے ؟ حضرت ابوبکر (رض) نے فرمایا : ہاں۔ تب لوگوں کو آپ (صلی اللہ علیہ وآلہ وسلم) کی وفات کا علم ہوا۔ پھر حضرت ابوبکر (رض) نکلے اور مہاجرین بھی جمع ہوگئے۔ انھوں نے آپس میں مشورہ کیا۔ طے پایا کہ انصاری بھائیوں کے پاس چلتے ہیں، ان کا بھی اس معاملے میں حصہ ہے۔ چنانچہ مہاجرین چل کر انصار کے پاس آئے ۔ ایک انصاری نے کہا : ہم میں سے ایک آدمی امیر ہوگا اور ایک آدمی تم میں سے۔ حضرت عمر (رض) نے فرمایا : ایک نیام میں دو تلواریں جمع ہوجائیں تو وہ درست نہیں رہ سکتیں۔ پھر انھوں نے حضرت ابوبکر (رض) کا ہاتھ تھاما اور لوگوں کو فرمایا : کون ہے جس کو ان کی تین باتوں کا اعزاز حاصل ہو۔ اذھمافی الغار۔ جب وہ دونوں غار (ثور) میں تھے وہ دونوں کون تھے ؟ اذیقول لصاحبہ جب اس (یعنی نبی (صلی اللہ علیہ وآلہ وسلم)) نے اپنے ساتھی کو کہا : کون تھا اس کا ساتھی ؟ لا تحزن ان اللہ معنا، رنج نہ کر اللہ ہمارے ساتھ ہے۔ اللہ کس کے ساتھ تھا ؟ چنانچہ حضرت عمر (رض) نے حضرت ابوبکر (رض) کا ہاتھ پھیلایا اور فرمایا : ان کی بیعت کرلو۔ چنانچہ لوگوں نے ان کی بیعت کرلی اور اچھی طرح بیعت کی اور نبہائی۔ السنن للبیہقی