14164 ابن عمر (رض) سے مروی ہے کہ جب نبی اکرم (صلی اللہ علیہ وآلہ وسلم) کی روح قبض ہوگئی تو مدینہ میں نفاق عام ہوگیا، عرب مرتد ہوگئے ، عجم مرتد ہوگئے دھمکیاں دینے لگے اور نہاوند میں اکٹھے ہوگئے اور بولے : اب وہ شخص مرچکا ہے جس کی وجہ سے عرب کی مدد کی جاتی تھی۔
چنانچہ حضرت ابوبکر (رض) مہاجرین اور انصار کو اکٹھا فرمایا اور پھر ارشاد فرمایا : عرب نے اپنی بکریاں اور اونٹ (زکوۃ میں دینے سے) روک لیے ہیں اور اپنے دین سے پھرگئے ہیں۔ جبکہ عجم نہاوند میں ہمارے خلاف جمع ہوگئے ہیں تاکہ تم سے قتال کریں۔ اور ان سب کا خیال ہے کہ جس شخص کی وجہ سے تمہاری مدد کی جاتی تھی اس کا انتقال ہوچکا ہے۔ اب تم لوگ مجھے مشورہ دو کیونکہ میں تم میں سے ایک عام آدمی ہوں میں تم کو اس آزمائش میں بھیجنا چاہتا ہوں۔
یہ سن کر حاضرین نے کافی دیر تک اپنے سر بگریبان کرلیے۔ پھر حضرت عمر (رض) بولے : میرا خیال ہے اللہ کی قسم ! اے خلیہ رسول اللہ ! آپ عرب سے صرف نماز قبول کرلیں اور زکوۃ ان سے چھوڑ دیں۔ کیونکہ ان کا زمانہ جاہلیت ابھی قریب ہی گزرا ہے، ابھی اسلام ان سے بدلہ نہ لے سکے گا۔ یا تو اللہ پاک ان کو خیر کی طرف واپس فرمادے گا یا پھر اللہ پاک اسلام کو غالب کردے گا، تب ہم طاقت ور ہوجائیں گے پھر ان کے ساتھ قتال کرلیں گے۔ ابھی یہ باقی ماندہ مہاجرین و انصار ہیں سارے عرب وعجم کا کیا مقابلہ کریں گے۔
پھر حضرت ابوبکر (رض) حضرت عثمان (رض) کی طرف متوجہ ہوئے۔ انھوں نے بھی اسی کی مثل کہا ۔ پھر حضرت علی (رض) کی طرف متوجہ ہوئے انھوں نے بھی اس کی مثل مشورہ دیا۔ پھر دوسرے مہاجرین نے بھی انہی کی پیروی کی۔ پھر حضرت ابوبکر (رض) انصار کی طرف متوجہ ہوئے وہ بھی گزشتہ لوگوں کی طرح بولے۔ یہ صورت حال دیکھ کر حضرت ابوبکر (رض) منبر پر چڑھ گئے اللہ کی حمدوثناء کی پھر ارشاد فرمایا :
امابعد ! اللہ تعالیٰ نے محمد (صلی اللہ علیہ وآلہ وسلم) کو بھیجا جب حق ناپید تھا، ترش رو تھا، اسلام غریب تھا، دھتکارا ہوا تھا، اس کی رسی بوسیدہ ہوچکی تھی اور اس کے اہل و عیال کم پڑگئے تھے۔ پھر اللہ نے ان کو محمد (صلی اللہ علیہ وآلہ وسلم) کے ساتھ جمع کردیا اور ان کی باقی رہنے والی کو امۃ وسطاً قرار دیا۔
اللہ کی قسم ! اب میں اللہ کے حکم کو قائم کرکے رہوں گا اور اس کی راہ میں جہاد کرتا رہوں گا حتیٰ کہ اللہ پاک ہمارے ساتھ اپنا وعدہ پورا کردے اور اپنا عہد پورا کردے ۔ پھر جو قتل ہوجائے گا وہ شہادت کی موت مرے گا اور جنت میں جائے گا اور جو پیچھے رہ جائیں گے وہ اللہ کی زمین میں اس کے خلیفہ بن کر رہیں گے اور حق کی عبادت کرنے والے ہوں گے۔ بیشک اللہ تعالیٰ نے ہم کو فرمایا ہے جس کی وعدہ خلافی نہیں ہوتی :
وعدہ اللہ الذین آمنوا منکم وعملوا الصالحات لیستخلفنھم فی الارض کما استخلف الذین من قبلھم،
اللہ نے وعدہ فرمایا ہے ان لوگوں سے جو تم میں سے ایمان لائے اور اچھے اچھے اعمال کیے ان کو زمین میں خلیفہ بنائے گا جس طرح ان لوگوں کو خلیفہ بنایا جو ان سے پہلے تھے۔ پھر حضرت ابوبکر (رض) نے فرمایا : اللہ کی قسم ! اگر وہ مجھے ایک رسی دینے سے بھی انکار کریں گے جو وہ رسول اللہ (صلی اللہ علیہ وآلہ وسلم) کو دیا کرتے تھے اور پھر ان کی مدد میں شجروحجر اور جن وانس بھی جمع ہوجائیں تو میں ان سے تب تک جہاد کرتا رہوں گا جب تک کہ میری روح اللہ سے نہیں جاملتی۔ بیشک اللہ نے نماز اور زکوۃ میں فرق نہیں کیا بلکہ ان کو ایک ساتھ ذکر کیا ہے۔
(یہ سن کر) حضرت عمر (رض) نے نعرہ اللہ اکبر بلند کیا اور فرمایا : اللہ کی قسم ! اللہ کی قسم ! جب اللہ نے ابوبکر کو قتال پر مضبوط اور پختہ عزم عطا کردیا تب مجھے خوب معلوم ہوگیا کہ یہی حق ہے۔
الخطیب فی رواۃ مالک