14165 صالح بن کیسان سے مروی ہے کہ جب ردۃ کا واقعہ پیش آیا (لوگ مرتد ہونے لگے) تو حضرت ابوبکر (رض) کھڑے ہوئے ، اللہ کی حمدوثناء کی ، پھر ارشاد فرمایا :
تمام تعریفیں اللہ کے لیے ہیں جس نے ہدایت بخشی اور کفایت کی ، عطا کیا اور غنی کردیا ۔ بیشک اللہ تعالیٰ نے محمد (صلی اللہ علیہ وآلہ وسلم) کو بھیجا جس وقت علم مفقود تھا، اسلام اجنبی اور دھتکارا ہوا تھا، اس کی رسی بوسیدہ تھی اور اس کا عہد کمزور تھا، اللہ پاک اہل کتاب سے ناراض تھا لہٰذا اس نے ان کو خیر عطا نہیں کی اور ان سے شر کو دفع نہیں کیا جو ان کے پاس تھا۔ انھوں نے اپنی کتاب کو تبدیل کردیا تھا اور وہ باتیں اس میں ڈال دی تھیں جو اس میں سے نہیں تھیں۔ جبکہ عرب ان پڑھ اور اللہ سے نابلد تھے، اس کی عبادت کرتے تھے اور نہ اس کو پکارتے تھے۔ ان کی زندگی مشقت و سختی میں تھی، وہ دین میں گمراہ تھے، ممنوعہ زمین میں تھے۔
نبی کریم (صلی اللہ علیہ وآلہ وسلم) کے ساتھ ان کے کچھ رفقاء تھے۔ جن کو اللہ نے اپنے نبی محمد کے ساتھ جمع کردیا تھا پھر ان کو امت وسطاً قرار دیا، ان کو ان کے پیروکاروں کے ساتھ مدد عطا کی، ان کے دشمنوں پر ان کو نصرت عطا کی حتیٰ کہ پھر اللہ پاک نے اپنے نبی کو اٹھا لیا۔ پھر شیطان دوبارہ ان کی اس سواری پر سوار ہوگیا جس سے اللہ نے اس کو اتاردیا تھا۔ اس نے ان کا ہاتھ پکڑ لیا اور ان کے ہلاک زدگان کا مردہ سنا :
وما محمد الا رسول قد خلت من قبلہ الرسل افان مات اوقتل انقلبتم علی اعقابکم ومن ینقلب علی عقبیہ فلن یضر اللہ شیئا وسیجزی اللہ الشاکرین،
اور محمد صرف رسول ہی تو ہیں، ان سے پہلے بھی رسول گزر چکے ہیں، کیا اگر وہ مرگئے یا شہید کردیئے گئے تو کیا تم پلٹ جاؤ گے ایڑیوں کے بل (الٹے پاؤں) اور جو الٹے پاؤں پھرا وہ اللہ کو کچھ نقصان نہیں دے گا اور عنقریب اللہ شکر گزاروں کو (اچھا) بدلہ عطا کرے گا۔
لوگو ! تمہارے آس پاس موجود عرب نے بکری اور انوٹ زکوۃ میں دینے سے روک لیے ہیں اب وہ اپنے دین میں نہیں رہے۔ اگر وہ اس کی طرف واپس آجائیں تو میں ان پر یہ جنگ مسلط نہیں کروں گا لیکن وہ پھر تمہارے دین میں تم سے قوی ہرگز نہ ہوں گے۔ یہ دین تم کو اس لیے دیکھنا پڑا ہے کہ تم سے تمہارے پیغمبر کی برکت چلی گئی ہے۔ لیکن وہ تم کو اس ذات پر نگہبان کے سپرد کرگیا ہے جو کافی ہے اور اول ہے۔ جس نے تمہارے نبی کو بھٹکا پایا تھا پھر اس کو ہدایت بخشی تھی ، فقیر پایا تھا پھر اس کو غنی و مالدار کردیا تھا :
ووجدک صالا فتھدی ووجدک عائلا فاغنی،
جبکہ تم کو اس نے جہنم کے کنارے پر کھڑا پایا تو تم کو اس سے بچا لیا۔
اب اللہ کی قسم ! میں نہیں چھوڑوں گا بلکہ اللہ کے امر پر قتال کرتا رہوں گا حتیٰ کہ اللہ پاک اپنا وعدہ پورا کردے اور اپنا عہد پورا کردے۔ جو ہم میں سے قتل ہوگیا وہ جنت میں ہوگا جو ہم میں سے بچ گیا وہ اللہ کا خلیفہ اور اس کا وارث ہوگا اس کی زمین پر۔ اللہ حق کا فیصلہ کرے گا اور اس کی بات میں کوئی وعدہ خلافی نہیں :
وعداللہ الذین آمنوا منکم وعملوا الصالحات لیستخلفنھم فی الارض
یہ فرما کر حضرت ابوبکر (رض) منبر سے نیچے تشریف لے آئے۔ ابن عساکر
کلام : امام ابن کثیر (رح) فرماتے ہیں : اس روایت مذکورہ میں انقطاع ہے صالح بن کیسان اور حضرت ابوبکر صدیق (رض) کے درمیان، لیکن روایت الفاظ متن کے حوالے سے بذات خود صحیح ہے کیونکہ اس کی بہت سی نظیریں موجود ہیں۔