14209 ضبۃ بن محصن سے مروی ہے کہ حضرت عمر بن خطاب (رض) نے حضرت ابوموسیٰ اشعری (رض) کو لکھا :
حمدوصلاۃ کے بعد !
بسا اوقات لوگوں کو اپنے بادشاہ سے نفرت ہوجاتی ہے۔ میں اللہ کی پناہ مانگتا ہوں کہ مجھے یا تم کو اس کا سامنا کرنا پڑے۔ تم حدود کو ضرور قائم کرو خواہ دن کے تھوڑے حصے میں سہی اور جب تمہارے سامنے دوکام پیش آجائیں جن میں سے ایک اللہ کے لیے ہو اور دوسرا دنیا کے لیے تو اللہ کے لیے کام کو ترجیح دینا۔ بیشک دنیا ختم ہوجائے گی اور آخرت باقی رہنے والی ہے۔ اور فاسق وگنہگاروں کو ڈراتے رہنا اور ان کو (جرم کی سزا میں) ایک ایک ہاتھ اور ایک ایک پاؤں والا کردینا، مسلمانوں کے مریض کی عیادت کرتے رہنا، ان کے جنازوں میں حاضری دیتے رہنا، اپنا دروازہ ان کے لیے کھلا رکھنا، ان کے مسائل کو خود حل کرنا، یادرکھ ! تو بھی انہی میں سے ایک فرد واحد ہے، بس یہ کہ تجھ پر ذمہ داری کا بوجھ ان سے زیادہ ہے۔ مجھے خبر ملی ہے کہ تم نے اپنا لباس ، طعام اور سواری میں نرالا انداز اختیار کرلیا ہے جو عام مسلمانوں کو میسر نہیں ہے۔ اے اللہ کے بندے اس جانور جیسا مت بن جو ایک سرسبزوادی میں گزرا تو اس کا ایک ہی مقصد رہ گیا کہ وہ کسی طرح کھا کھا کر فربہ ہوجائے۔ حالانکہ اس کی فربہی ہی میں اس کی اچانک موت کا راز لکھا ہے۔ یادرکھ ! ۔ امیر جب کج رو ہوجائے تو اس کی رعایا بھی کج روی اختیار کرلیتی ہے اور لوگوں میں سب سے بڑا بدبخت وہ ہے جس کی وجہ سے اس کی رعایا بدبخت ہوجائے۔ الدینوری