14242 عثمان بن عبداللہ قرشی سے مروی ہے : ہمیں یوسف بن اسباط نے مخلد الضبی سے ، مخلد نے ابراہیم نخعی سے، انھوں نے علقمہ سے اور علقمہ حضرت ابوذر (رض) سے روایت کرتے ہیں کہ جب حضرت عثمان (رض) کی بیعت کا پہلا دن تھا اور مہاجرین وانصارمسجد (نبوی (صلی اللہ علیہ وآلہ وسلم)) میں جمع تھے، اس وقت حضرت علی (رض) تشریف لائے اور ارشاد فرمایا :
سب سے پہلی چیز جس کے ساتھ ابتداء کرنے والوں کو ابتداء کرنی چاہیے، بولنے والوں کو بولنا چاہیے اور بات کرنے والوں کو سب سے پہلے اس کو منہ سے نکالنا چاہیے وہ اللہ کی حمد اور اس کی ثناء ہے۔ جس کا وہ اہل ہے اور محمد (صلی اللہ علیہ وآلہ وسلم) پر درود ہے۔ پھر فرمایا : پس تمام تعریفیں اللہ کے لیے ہیں جو دائمی بقاء کے لیے تنہا ذات ہے، سلطنت کا اکیلا مالک ہے، اس کے لیے فخر، بذرگی اور زیباء ہے، اس کی بزرگی کے آگے دوسرے تمام الہٰوں اور معبودوں نے سر ٹیک دیئے ہیں، قلوب اس کی خشیت سے لرزتے ہیں، اس کا کوئی برابر نہیں ، اس کا کوئی شریک نہیں، کوئی اس کی مخلوق میں سے اس کا مشابہ نہیں۔ ہم اس کے لیے ان صفات کی گواہی دیتے ہیں جو اس نے اپنی ذات کے لیے بیان کی ہیں، اور اس کی مخلوق میں سے اہل علم نے بیان کی ہیں، اس کے سوا کوئی معبود نہیں، اس کی صفت کو کوئی پا نہیں سکتا، اس کی حد کو کوئی مثال بھی بیان نہیں کی جاسکتی، وہ انگلیوں کے اشاروں سے بادل برسانے والا ہے، کھلے میدانوں اور پہاڑوں کی چوٹیوں کو موسلادھار بارش سے سیراب کرنے والا ہے، جب چشموں سے ڈول بھر بھر کر نکلتے ہیں اور چرند پرند، حشرات الارض اور تمام مخلوق زندگی پاتی ہے۔ بس پاک ہے وہ ذات جس کے دین کے آگے تمام دین سرنگوں ہیں اور اس کے دین کے سوا کوئی دین قابل اتباع نہیں۔ ہم شہادت دیتے ہیں کہ ہمارے سردار محمد (صلی اللہ علیہ وآلہ وسلم) اس کے پسندیدہ بندے، اس کے منتخب پیغمبر اور اس کے مقبول رسول ہیں۔ جن کو اللہ نے ہم سارے جہان والوں کی طرف مبعوث کیا ایسے وقت کہ لوگ بتوں کی عبادت میں منہمک تھے، گمراہی کے آگے جھکے ہوئے تھے، ایک دوسرے کا خون بہاتے تھے، اپنی اولاد کو قتل کرتے تھے، ان کے راستے ظلم وستم کے راستے تھے، ان کی زندگی ظلم کا نام تھی، ان کا امن بھی خوف کے دامن میں پناہ گیر تھا، ان کی عزت ذلت تھی، ایسے وقت آپ (صلی اللہ علیہ وآلہ وسلم) رحمت بن کر تشریف لائے حتیٰ کہ اللہ پاک نے محمد (صلی اللہ علیہ وآلہ وسلم) کے طفیل ہم کو گمراہی سے بچا لیا اور ہم کو انہی کے طفیل جہالت سے ہدایت بخشی، ہم اس عرب کے معاشرہ والے تھے ، جن کی زندگی تمام اقوام میں تنگی ومشقت والی تھی، ان کا لباس سب سے گھٹیا لباس تھا، ہمارا سب سے عمدہ طعام اندرائن (کڑوا) پھل تھا ۔ ہمارا سب سے عمدہ لباس اون تھا۔ ہم آگے اور بتوں کے پجاری تھے۔ پھر اللہ نے ہم کو محمد کے طفیل ہدایت عطا کی، اور ان کو نور کا ایسا شعلہ بنایا جس سے زمین کے سارے مشرق ومغرب روشن ہوگئے، پھر اللہ نے ان کو اپنے پاس اٹھا لیا، انا للہ وانا الیہ راجعون۔
ہائے ! کس قدر بڑی آفت اور کس قدر عظیم مصیبت تھی ان کا رخصت ہونا۔ اس غم میں تمام مومن برابر کے شریک ہیں، سب کی مصیبت ایک ہے، پھر ان کی جگہ ابوبکر (رض) کھڑے ہوگئے۔ اللہ کی قسم ! اے گروہ مہاجرین ! میں نے ایسا خلیفہ نہیں دیکھا انھوں نے کس قدر مضبوطی سے تلوار کو تھاما مرتدین سے جنگ کے دن (جب اسلام پر کڑی آزمائش کا وقت تھا) اللہ نے ان کے طفیل اپنے نبی کی سنت (اور دین) کو زندہ کیا۔ جب ابوبکر (رض) نے فرمایا : اللہ کی قسم ! اگر وہ مجھے اس کا ایک رسی کو دینے سے بھی انکار کریں گے جو وہ رسول اللہ (صلی اللہ علیہ وآلہ وسلم) کو دیا کرتے تھے تو میں اللہ کے لیے ان سے جہاد کروں گا۔ چنانچہ میں نے ان کی بات کو سنا اور اطاعت کی اور مجھے اچھی طرح علم ہوگیا تھا کہ ابوبکر کی رائے میں سراسر خیر ہے۔ پھر وہ دنیا سے بھوکے پیٹ ہی نکل گئے۔ میں ابوبکر کی یہ تعریف کیوں نہ کروں جبکہ وہ ثانی اثنین تھے، ان کی بیٹی ذات النطاقین (دو دپٹوں والی) تھی جو اپنی چادر کو اپنے سر پر لپیٹ لیتی اور مس کے پلو میں روٹیاں باندھ کر محمد (صلی اللہ علیہ وآلہ وسلم) (اور اپنے والد) کے لیے جاتی تھی۔ میں کیوں نہ یہ باتیں کہو ! ابوبکر (رض) نے تین عورتوں اور چار آدمیوں کو خرید (کر آزاد) کیا جن کو محض اللہ کے لیے کفار نے اذیتیں دیں، انہی میں سے ایک بلال بھی تھے۔ رسول اللہ (صلی اللہ علیہ وآلہ وسلم) نے ان کے مال کے ساتھ ہجرت کی تیاری کی، حضرت ابوبکر کے پاس اس دن چالیس ہزار درہم تھے، وہ انھوں نے سب کے سب رسول اللہ (صلی اللہ علیہ وآلہ وسلم) کے حوالے کردیئے۔ آپ (صلی اللہ علیہ وآلہ وسلم) ان کے ساتھ مدینہ طیبہ ہجرت کرکے تشریف لے گئے۔ پھر ابوبکر کے بعد ان کی جگہ عمر فاروق بن الخطاب کھڑے ہوئے، انھوں نے (تہہ بندکس کر باندھ لیا اور) پنڈلیوں سے کپڑا اونچا کرلیا اور اپنی آستینیں چڑھا لیں۔ ان کو اللہ کے بارے میں کسی ملامت کرنے والے کی ملامت کا خوف نہ تھا۔ ہم دیکھتے تھے کہ سکینہ عمر کی زبان پر بول رہی ہے۔ اور میں ان کے لیے یہ باتیں کیوں نہ کہوں حالانکہ میں نے رسول اللہ (صلی اللہ علیہ وآلہ وسلم) کو ابوبکر اور عمر کے درمیان چلتا ہوا دیکھا اور آپ (صلی اللہ علیہ وآلہ وسلم) فرما رہے تھے : ہم اسی طرح جئیں گے، اسی طرح مریں گے، اسی طرح ہم کو ساتھ ساتھ اٹھایا جائے گا اور اسی طرح اکٹھے جنت میں داخل ہوں گے ۔ میں فاروق کی خوبی کیوں نہ بیان کرو جبکہ شیطان ان کی آہٹ سے بھی بھاگتا تھا۔ پھر وہ شہید ہو کر چلے گئے، ان پر اللہ کی رحمت ہو۔ اور اے گروہ مہاجرین تم خوب جانتے ہو کہ تمہارے اندر ابوعبداللہ یعنی حضرت عثمان بن عفان جیسا کوئی صاحب فضیلت شخص نہیں ہے۔ کیا نبی اکرم (صلی اللہ علیہ وآلہ وسلم) نے ان کو یکے بعد دیگرے دو بیٹیاں شادی میں نہیں دیں۔ جب نبی اکرم (صلی اللہ علیہ وآلہ وسلم) اپنی لخت جگر عثمان کی بوی کو دفن فرما کر ابھی قبرستان میں ہی موجود تھے کہ حضرت جبرائیل (علیہ السلام) تعزیت کے لیے آئے اور آپ کو فرمایا : اے محمد ! اللہ حکم دیتا ہے کہ آپ عثمان کو اس کی دوسری بہن شادی میں دیدیں۔ میں کیوں نہ ان کے متعلق یہ کہوں حالانکہ ابوعبداللہ نے جیش العسرت (غزوہ تبوک) کی۔ مکمل آپ (صلی اللہ علیہ وآلہ وسلم) کے لیے گرم گرم سخینہ (آٹے گھی کھجور سے تیار کھانا) طباق میں تیارکروا کر حضور کے آگے پیش کیا، اس وقت وہ جوش مارہا تھا، آپ (صلی اللہ علیہ وآلہ وسلم) نے فرمایا : اس کو کناروں سے کھاؤ، اس کی بلندی کو نہ گراؤ کیونکہ برکت اوپر سے نازل ہوتی ہے، چونکہ رسول اللہ (صلی اللہ علیہ وآلہ وسلم) نے تیز گرم کھانا کھانے سے منع فرمایا ہے۔ چنانچہ جب رسول اللہ (صلی اللہ علیہ وآلہ وسلم) نے یہ کھانا کھایا جو گھی، شہد اور آٹے وغیرہ سے بنا ہوا تھا تو اس کے گرم ہونے کی وجہ سے اپنے ہاتھ کھینچ لیے اور مخلوق کے پیدا کرنے والے کی طرف اپنے ہاتھ بلند کرکے ارشاد فرمایا : اے عثمان ! اللہ نے تیرے اگلے پچھلے گناہ بخش دیئے ہیں تیرے مخفی اور اعلانیہ گناہ بخش دیئے۔ اے اللہ ! عثمان کی آج کی نیکی نہ بھلانا۔ پھر حضرت علی (رض) نے فرمایا : اے مہاجرین کی جماعت ! تمکو معلوم ہوگا کہ ایک مرتبہ ابوجہل کا اونٹ بدک گیا۔ رسول اللہ (صلی اللہ علیہ وآلہ وسلم) نے عمر (رض) کو ارشاد فرمایا : اے عمر ! یہ اونٹ ہمارے پاس لاؤ ۔ اونٹ بھگ کر ابوسفیان کے قافلے میں شامل ہوگیا۔ اونٹ پر سونے چاندی کے حلقے والی لگام پڑی ہوئی تھی اور ابوجہل کا دیباج کا پالان تھا جو اونٹ پر پڑا ہوا تھا۔ حضور (صلی اللہ علیہ وآلہ وسلم) نے عمر (رض) کو فرمایا : اے عمر ! یہ اونٹ ہمارے پاس لاؤ۔ حضرت عمر (رض) نے عرض کیا : یارسول اللہ ! وہاں قافلے میں سرداران قریش اس سے تھوڑے ہی ہیں۔ تب رسول اللہ (صلی اللہ علیہ وآلہ وسلم) نے جانا کہ تعداد اور مادۃ عبدمناف کے لیے ہے۔ پھر رسول اللہ (صلی اللہ علیہ وآلہ وسلم) نے عثمان کو ابوسفیان کے قافلے کی طرف بھیجا اونٹ لانے کے لیے حضرت عثمان ارشاد کی تعمیل کے لیے اپنے اونٹ پر بیٹھ کر چل دیئے جبکہ نبی اکرم (صلی اللہ علیہ وآلہ وسلم) کو ان (کی دلیری) پر انتہائی تعجب ہورہا تھا چنانچہ عثمان ابوسفیان کے پاس پہنچے تو ابوسفیان جو اپنے سرداروں کے درمیان حبوہ باندھے بیٹھا تھا عثمان کو دیکھ کر تعظیماً واکراماً اٹھ کھڑا ہوا اور پوچھا : عبداللہ کے بیٹے (محمد) کو کیسے حال میں پیچھے چھوڑ کر آئے ہو ؟ حضرت عثمان (رض) نے ان کو فرمایا : قریش کے سرداروں کے درمیان ان کی بلندی اور کوہان پر بیٹھا چھوڑ آیا ہوں، اے ابوسفیان ! وہ سرداروں کے سردار ہیں، جو اس قدر بلندی پر پہنچ گئے ہیں کہ آفتاب ضیاء پاش تک ان کی رسائی ہے، اور وہ اس قدر راسخ ہیں گویا بحرذخار ہیں، ان کی آنکھیں (امت کے غم میں برسنے) والی ہیں، ان کے جھنڈے بلند ہیں۔ اے ابوسفیان ! محمد کو جدا کرکے ہمارے پاس کوئی قابل فخر چیز نہیں رہ جاتی اور محمد کے زوال کے ساتھ ہماری کمر ٹوٹ جانے والی ہے۔ ابوسفیان نے کہا : اے ابوعبداللہ ! ابن عبداللہ (محمد) کا اکرام کرو، وہ چہرہ مصحف شریف کا ورقہ ہے۔ مجھے امید ہے کہ وہ بہترین جانشین کا بہترین جانشین ہوگا، ابوسفیان بات کرتے جاتے اور زمین پر کبھی اپنے ہاتھ کو مارتے اور کبھی اپنے پاؤں کو مارتے۔ پھر انھوں نے اونٹ عثمان (رض) کے حوالے کردیا۔ حضرت علی (رض) نے فرمایا : پس کونسی کرامت اور فضیلت عثمان کے لیے اس سے بڑی ہوگی۔ اللہ کا حکم جس کے متعلق چاہے گا نافذ ہو کر رہے گا۔ پھر ابوسفیان نے کھانے کی رقاب منگوائی جس میں خوب روغن ڈالا ہوا تھا پھر دودھ منگوایا اور بولے : اے ابوعبداللہ ! لو ! ابوعبداللہ عثمان نے فرمایا : میں اپنے پیچھے نبی اکرم (صلی اللہ علیہ وآلہ وسلم) کو ایسی حد پر چھوڑ کر آیا ہوں کہ یہاں بیٹھ کر کھانا نہیں کھا سکتا۔ پھر عثمان کو تاخیر ہوئی تو حضور اکرم (صلی اللہ علیہ وآلہ وسلم) نے ارشاد فرمایا : ہمارے ساتھی کو تاخیر ہوگئی ہے، اے صحابہ ! (لڑائی پر) میری بیعت کرو۔
ادھر ابوسفیان عثمان (رض) کو بولے : اگر تم نے ہمارا کھانا کھالیا تو ہم اونٹ کو اصلی حالت میں لوٹا دیں گے۔ چنانچہ حضرت عثمان (رض) نے ابوسفیان کے پیش کردہ کھانے میں سے تھوڑا چکھ لیا۔ پھر نبی اکرم (صلی اللہ علیہ وآلہ وسلم) کے اپنے صحابہ سے بیعت لینے کے بعد عثمان (رض) واپس ان کے پاس پہنچ گئے۔
پھر حضرت علی (رض) نے (اپنے متعلق) ارشاد فرمایا : میں تم کو اللہ کا واسطہ دیتا ہوں بتاؤ کیا ایسا نہیں ہے کہ جبرائیل (علیہ السلام) رسول اللہ (صلی اللہ علیہ وآلہ وسلم) کے پاس تشریف لائے اور فرمایا : اے محمد تلوار تو صرف ذوالفقار ہے، نوجوان صرف علی ہے۔ تم جانتے ہو، بتاؤ کیا یہ فرمان میرے علاوہ کسی اور کے لیے تھا ؟ میں تم کو واسطہ خداوندی دیتا ہوں بتاؤ کیا تم یہ نہیں جانتے کہ ایک مرتبہ حضرت جبرائیل (علیہ السلام) محمد (صلی اللہ علیہ وآلہ وسلم) پر نازل ہوئے اور فرمایا : اے محمد ! اللہ آپ کو حکم فرماتا ہے کہ آپ علی سے محبت کریں اور جو علی سے محبت کرے اس سے بھی محبت رکھیں۔ بیشک اللہ بھی علی سے محبت فرماتا ہے۔ اور ہر اس شخص سے محبت فرماتا ہے جو علی کو محبوب رکھتا ہے۔ تب لوگوں نے حضرت علی (رض) کو جواباً بیک آواز عرض کیا : ہاں اللہ جانتا ہے ایسا ہی ہے۔ پھر حضرت علی (رض) نے فرمایا : میں تم کو اللہ کا واسطہ دیتا ہوں کیا تم نہیں جانتے کہ رسول اللہ (صلی اللہ علیہ وآلہ وسلم) نے ارشاد فرمایا : جب مجھے ساتویں آسمان پر لے جایا گیا تو نور کے خیموں تک مجھے اوپر اٹھالیا گیا پھر مجھے نور کے پردوں تک اوپر اٹھایا گیا۔ پھر اللہ نے نبی (صلی اللہ علیہ وآلہ وسلم) کو کچھ چیزیں وحی فرمائیں۔ جب آپ واپس لوٹنے لگے تو پردوں کے پیچھے سے آپ کو آواز دی گئی : اے محمد ! تیرا باپ ابراہیم (علیہ السلام) بہترین باپ ہے اور تیرا بھائی علی بہترین بھائی ہے۔ اے مہاجرین و انصار ! تم جانتے ہو کہ یہ حقیقت ہے۔ یہ سن کر حضرت عبدالرحمن بن عوف (رض) لوگوں کے درمیان کھڑے ہوئے اور ارشاد فرمایا : میں نے رسول اللہ (صلی اللہ علیہ وآلہ وسلم) سے یہ بات نہ سنی ہو جو آپ بیان فرما رہے ہیں تو میرے کان بہرے ہوجائیں۔ پھر حضرت علی (رض) نے فرمایا : تم لوگ جانتے ہو کہ مسجد میں میرے سوا کوئی اجنبی حالت میں داخل ہوتا تھا ؟ لوگوں نے کہا : اللہ گواہ ہے ، نہیں۔ پھر فرمایا : تم جانتے ہو کہ جب میں رسول اللہ کے دائیں طرف ہو کر قتال کرتا تھا تو ملائکہ آپ کے بائیں طرف ہو کر لڑتے تھے۔ لوگوں نے کہا : ہاں واللہ ! ایسا ہی ہے۔ پھر فرمایا : تم جانتے ہو کہ رسول اللہ (صلی اللہ علیہ وآلہ وسلم) نے مجھے ارشاد فرمایا تھا :
میرے لیے جیسے ہارون موسیٰ کے لئے۔ لیکن یاد رکھو میرے بعد کوئی نبی نہیں آئے گا۔ اور کیا تم جانتے ہو کہ رسول اللہ (صلی اللہ علیہ وآلہ وسلم) حسن اور حسین کے درمیان بھائی چارہ کرتے تھے۔ چنانچہ دو مرتبہ فرماتے : یا حسن ! فاطمہ کہتی : یارسول اللہ ! حسین اس سے چھوٹا ہے اور اس سے کمزور ہے۔ تب رسول اللہ (صلی اللہ علیہ وآلہ وسلم) فاطمہ کو فرماتے : کیا تو اس پر راضی نہیں ہے کہ میں کہوں : جلدی اے حسن ! اور جبرائیل کہے : جلدی اے حسین !۔ یعنی اگر میں حسن کو زیادہ طرف داری کرتا ہوں تو جبرائیل حسین کی حمایت زیادہ کرتے ہیں یوں دونوں میں مساوات ہوگئی۔
حضرت علی (رض) نے فرمایا : کسی اور مخلوق کو ہماری ایسی فضیلت حاصل ہے کیا ؟ ہم صبر کرنے والے ہیں کہ اللہ جو فیصلہ کرتا ہے وہ ہونے والا ہے۔ ابن عساکر