14243 عن زافرعن رجل عن الحارث بن محمد عن ابی الطفیل عامر بن واثلۃ ، ابوالطفیل عامر بن واثلۃ سے مروی ہے کہ شوریٰ کے روز میں دروازے پر نگران تھا۔ اندر موجود (چھ) حضرات کے درمیان آوازیں بلند ہونا شروع ہوگئیں، میں نے حضرت علی (رض) کو فرماتے ہوئے سنا :
لوگوں نے ابوبکر کی بیعت کی ، اللہ کی قسم میں اس منصب کا ان سے زیادہ اہل تھا۔ اور ان سے زیادہ حقدار بھی تھا۔ لیکن پھر میں نے ان کی بات کو سن لیا اور اطاعت کرلی اس خوف سے کہ کہیں لوگ (اختلافات کے باعث) کفار نہ بن جائیں اور تلوار سے ایک دوسرے کی گردن اڑانے لگیں پھر لوگوں نے عمر کی بیعت کرلی اور اللہ کی قسم میں ان سے زیادہ اس منصب کا اہل اور حقدار تھا، لیکن پھر بھی میں نے سنا اور اطاعت کی اس خوف سے کہ کہیں لوگ (اختلافات کے باعث) کفر کی طرف نہ لوٹنے لگیں اور ایک دوسرے کی گردنیں اڑانے لگیں۔ پھر اب تم ارادہ کرتے ہو کہ عثمان کی بیعت کرو اب بھی میں سنوں گا اور اطاعت کروں گا۔ عمر نے مجھے پانچ لوگوں کے ساتھ شامل کیا ہے میں ان کا چھٹا آدمی ہوں ۔ انھوں نے ان پر میری کوئی فضیلت اور صلاحیت زیادہ محسوس نہیں کی۔ اور نہ تمہی پانچ افراد اس کو میرے لیے جانتے ہو، اب ہم سب اس میں برابر ہیں۔ اللہ کی قسم ! اگر میں چاہوں تو لوگوں سے بات کروں تو پھر کوئی عربی اور نہ عجمی ، نہ ذمی اور نہ کوئی مشرک میری بیان کردہ صفات سے انکار کی گنجائش کرسکتا ہے۔ میں ایسا بھی کرسکتا ہوں اگر چاہوں ، اب اے جماعت ! میں تم کو اللہ کا واسطہ دیتا ہوں ! بتاؤ تم میں کوئی ایسا شخص ہے جس کے ساتھ رسول اللہ (صلی اللہ علیہ وآلہ وسلم) نے بھائی چارہ کیا ہو میرے سوا ؟ لوگوں نے کہا : اللھم لا، خدا جانتا ہے، نہیں۔ حضرت علی (رض) نے فرمایا : اے جماعت ! میں تم کو اللہ کا واسطہ دیتا ہوں بتاؤ کیا تم میں ایسا کوئی شخص ہے جس کا چچا میرے چچا حمزۃ ، جن کو رسول اللہ (صلی اللہ علیہ وآلہ وسلم) نے اسد اللہ اور اسد رسولہ کہا یعنی اللہ اور اس کے رسول کا شیر، جیسا ہو ؟ لوگوں نے کہا : اللھم لا، پھر فرمایا کیا تم میں کوئی ایسا ہے جس کا بھائی میرے بھائی جعفر جیسا ہو، جو ذوالجناحین تھے جو دوپروں کے ساتھ جنت میں مزین ہوں گے اور جنت میں ان کے ساتھ جہاں چاہیں گے اڑتے پھریں گے ؟ لوگوں نے کہا : نہیں۔ آپ (رض) نے فرمایا : کیا کوئی میری اولاد حسن و حسین جیسی اولاد رکھتا ہے، جو اہل جنت کے لوگوں کے سردار ہوں گے۔ لوگوں نے کہا : نہیں۔ فرمایا : کیا تم میں کوئی ایسا ہے جس کی بیوی میری بیوی فاطمہ جیسی ہو ؟ جو بنت رسول اللہ ہے ؟ لوگوں نے کہا نہیں۔ فرمایا : کیا تم میں کوئی ایسا شخص ہے جس نے مجھ سے زیادہ مشرکوں کو قتل کیا ہو ہر جنگ کے وقت جب بھی وہ رسول اللہ کو پیش آئی ؟ لوگوں نے کہا نہیں ۔ حضرت علی (رض) نے پوچھا : کیا تم میں ایسا کوئی شخص ہے جو مجھ سے زیادہ رسول اللہ (صلی اللہ علیہ وآلہ وسلم) کو زیادہ فائدہ پہنچانے والا ہو اس دن جب (آپ نے ہجرت کی اور) میں آپ کے بستر پر لیٹ گیا ، میں نے اپنی جان کے ساتھ آپ کی حفاظت کی گویا اپنا خون ان کے لیے پیش کردیا۔ لوگوں نے کہا : نہیں۔ پوچھا : کیا تم میں ایسا کوئی شخص ہے جو مال غنیمت کا خمس لیتا ہو میرے اور فاطمہ کے سوا ؟ لوگوں نے کہا : نہیں۔ پوچھا : کیا تم میں کوئی ایسا شخص ہے جس کو کتاب اللہ میں مطہر کیا گیا ہو میرے سوا جب نبی اکرم (صلی اللہ علیہ وآلہ وسلم) نے مہاجرین کے دروازوں کو بند کردیا تھا اور میرا دروازہ کھول دیا تھا تب آپ (صلی اللہ علیہ وآلہ وسلم) کے دو چچا حمزہ اور عباس اٹھے اور انھوں نے پوچھا : یارسول اللہ ! آپ نے ہمارے دروازے بند کردیئے ہیں اور علی کا دروازہ کھول دیا ہے۔ حضور اکرم (صلی اللہ علیہ وآلہ وسلم) نے فرمایا : میں نے علی کا دروازہ کھولا ہے اور نہ تمہارے دروازے بند کیے ہیں، بلکہ اللہ ہی نے اس کا دروازہ کھولا اور تمہارے دروازے بند کیے ہیں۔ لوگوں نے کہا : نہیں۔ حضرت علی (رض) نے پوچھا : کیا تم میں کوئی ایسا شخص ہے اللہ نے جس کا نور آسمان سے تام کردیا ہو میرے سوا ؟ جب اللہ تعالیٰ نے فرمایا : وآت ذالقربیٰ حقہ، اور قرابت (رشتے) دار کو اس کا حق دو ، لوگوں نے کہا : نہیں۔ حضرت علی (رض) نے پوچھا : کیا تم میں میرے سوا کوئی ایسا شخص ہے جس کو رسول اللہ (صلی اللہ علیہ وآلہ وسلم) نے خود بارہ دفعہ پکارا ہو، جب اللہ تعالیٰ نے یہ فرمان نازل فرمایا تھا :
یا ایھا الذین آمنوا ذا ناجیتم الرسول فقد موبین یدی نجواکم صدقۃ۔
اے ایمان والو ! جب تم رسول سے سر گوشی۔ کلام کرو تو اپنی سرگوشی سے صدقہ کردو۔
لوگوں نے کہا : نہیں۔ آپ (رض) نے پوچھا : کیا تم میں ایسا کوئی شخص ہے میرے سوا، جس نے رسول اللہ (صلی اللہ علیہ وآلہ وسلم) کی آنکھوں کو بند کیا ہو ؟ لوگوں نے کہا : نہیں۔ آپ (رض) نے پوچھا : کیا تم میں ایسا کوئی شخص ہے میرے سوا جو آخری موقع پر رسول اللہ (صلی اللہ علیہ وآلہ وسلم) کے ساتھ ہو جب آپ کو قبر میں رکھا گیا تھا (کیونکہ قبر میں اتارنے والا میں بھی تھا) ۔ لوگوں نے کہا : نہیں ۔ العقیلی
کلام : یہ روایت ضعیف بلکہ اس سے بھی بڑھ کر غیر اصل ہے۔ امام عقیلی ضعفاء میں فرماتے ہیں مذکورہ روایت کا حضرت علی (رض) سے منقول ہونا۔ کچھ حقیقت نہیں رکھتا، نیز اس میں دو مجہول آدمی راوی ہیں۔ ایک آدمی جس کا زافر نے نام نیں لیا اور حارث بن محمد۔
نیز فرماتے ہیں مجھے آدم بن موسیٰ نے کہا میں نے امام بخاری سے سنا ہے فرماتے ہیں کہ یہ طریق حارث بن محمد عن ابی الطفیل کنت علی الباب یوم الشوریٰ اس پر زافر کے علاوہ کسی نے زافر کی متابعت نہیں کی۔
نیز امام ابن جوزی (رح) نے اس کو موضوع من گھڑت مرویات میں شمار کیا ہے اور فرماتے ہیں زافر مطعون شخص ہے اور وہ مبہم آدمی سے روایت کرتا ہے۔ امام ذھبی میزان میں فرماتے ہیں : یہ روایت منکر اور غیر صحیح ہے۔ امام ابن حجر اللسان میں فرماتے ہیں : شاید اس روایت میں ساری آفت زافر کی طرف سے ہے۔ جبکہ امام ابن حجر اپنی امالیہ میں یہ بھی فرماتے ہیں زافر کذب کے ساتھ مہتم نہیں ہے ہاں جب اس کی روایت پر متابعت ہوجاتی ہے تو وہ حسن شمار ہوتی ہے (تب بھی اس روایت پر کوئی متابع نہیں) بہر صورت روایت مذکورہ ناقابل اعتبار اور غیر مستند ہے۔