14245 عمرو بن میمون سے مروی ہے کہ میں حضرت عمر (رض) کے پاس حاضر ہوا تو آپ حذیفہ اور عثمان بن حنیف کے سامنے کھڑے تھے اور ان کو فرما رہے تھے :
تخافان ان تکونا حملتما الارض ما لا تطبق ؟ فقال عثمان : لوشئت لا ضعفت ارضی، وقال حذیفۃ : لقد حملت الارض امراھی لہ مطیقۃ وما فیھا کبیر فضل وقال : انظر امالدیکما ان تکونا حملتما الارض مالا تطیق۔
تم اس بات سے ڈر رہے ہو کہ کہیں تم کو دور کے سفر پر روانہ نہ کردیا جائے جس کی تم میں سہار نہ ہو ، عثمان بولے : اگر میں چاہوں تو اپنی زمین سے آگے مزید سفر بھی کرسکتا ہوں۔ حذیفہ بولے : اگر مجھے دور دراز کے سفر پر بھیجا جائے تو میں اس پر جاسکتا ہوں اور اس میں کوئی بڑی فضیلت نہیں۔ حضرت عمر (رض) نے فرمایا : تم دیکھ لو کہ اگر تم کو لمبے سفر پر بھیجا جائے تو تمہارے پاس کیا کچھ زادراہ ہے ؟ واللہ اعلم بمرادہ الصحیح۔
پھر آپ (رض) نے ارشاد فرمایا : اللہ کی قسم ! اگر اللہ پاک نے مجھے سلامت رکھا تو میں عراق کے فقیروں کو ایسا غنی کردوں گا کہ وہ میرے بعد کبھی کسی کے سامنے ہاتھ نہیں پھیلائیں گے۔ پھر بھی ان پر چوتھا دن نہ گزرا تھا کہ ان پر حملہ کردیا گیا۔
حضرت عمر (رض) جب مسجد میں داخل ہوتے تو صفوں کے درمیان کھڑے ہوجاتے تھے پھر ارشاد فرماتے : صفیں سیدھی کرلو۔ جب وہ صفیتں سیدھی کرلیتے تو آگے بڑھ کر (مصلی پر جاکر) تکبیر کہہ دیتے۔ چنانچہ حملہ کے موقع پر جب آپ نے تکبیر کہہ دی (نماز کی نیت باندھ لی) تو اسی جگہ آپ پر خنجر کے وار کیے گئے۔ عمرو بن میمون کہتے ہیں : میں نے اس وقت آپ کو یہ کہتے ہوئے سنا قتلتی الکلب یا فرمایا اکلنی الکلب مجھے کتے نے قتل کردیا یا فرمایا مجھے کتا کھا گیا۔ عمرو فرماتے ہیں یاد نہیں آپ نے ان میں سے کیا فرمایا تھا۔ پھر حضرت عمر (رض) نے عبدالرحمن بن عوف (رض) کا ہاتھ پکڑ کر ان کو آگے کردیا۔ جبکہ حملہ آور عجمی کافر بھاگ پڑا، اس کے ہاتھ میں دو دھاری خنجر تھا وہ دائیں بائیں جس آدمی کے پاس سے گزرتا اس پر حملہ کرتا جاتا حتیٰ کہ اس نے تیرا آدمیوں پر خنجر کے وار کیے، جن میں سے نو افراد جاں بحق ہوگئے۔ یہ منظر دیکھ کر ایک مسلمان نے پکڑنے کے لیے اس پر چادر ڈال دی جس میں وہ الجھ گیا، جب اس نے دیکھا کہ وہ پکڑا جاچکا ہے تو اس نے خود کو ذبح کرکے خود کشی کرلی، عمرو فرماتے ہیں : پھر ہم نے مختصر فجر کی نماز ادا کی۔ مسجد کے دور کے اطراف و جوانب والوں کو اس واقعہ کا پتہ نہ چل سکا۔ انھوں نے جب حضرت عمر (رض) کی آواز نہ سنی تو دو مرتبہ سبحان اللہ سبحان اللہ کہا۔ جب لوگ نماز پڑھ کر چلے گئے تو سب سے پہلے حضرت ابن عباس (رض) حضرت عمر (رض) کی خدمت میں حاضر ہوئے۔ حضرت عمر (رض) نے ان کو فرمایا : دیکھ کر آؤ مجھے قتل کرنے والا کون تھا ؟ چنانچہ ابن عباس (رض) ایک چکر لگا کر آئے اور عرض کیا وہ مغیرۃ (رض) کا (کافر) کاریگر غلام تھا۔ حضرت عمر (رض) نے فرمایا : تمام تعریفیں اللہ کے لیے ہیں جس نے میری موت ایسے شخص کے ہاتھ نہیں لکھی جو اسلام کا دعویٰ کرتا ہو۔ اللہ اس کو قتل کرے، میں نے تو اس کو بھلی بات کا کہا تھا۔
پھر حضرت عمر (رض) نے حضرت ابن عباس (رض) کو مخاطب ہو کر فرمایا : تو اور تیرا باپ ہی پسند کرتے تھے کہ عجمی لوگ مدینے میں کثرت سے آئیں۔ ابن عباس (رض) نے عرض کیا : اگر آپ چاہیں تو ہم (ان کو نکال سکتے ہیں اور) ایسا کرسکتے ہیں۔ حضرت عمر (رض) نے فرمایا : اب جبکہ وہ تمہاری بات کے ساتھ بات کرنے لگے ہیں۔ تمہاری نماز کے ساتھ نماز پڑھنے لگے ہیں اور تمہارے طریقوں پر چل پڑے ہیں۔
لوگوں نے حضرت عمر (رض) سے عرض کیا : آپ کو پریشان ہونے کی ضرورت نہیں (اللہ شفاء دے گا) حضرت عمر (رض) نے۔ اس کے جواب میں نبیذ (مشروب) منگوایا وہ پیا تو وہ آپ کے پیٹ کے زخم سے نکل گیا۔ پھر آپ (رض) نے دودھ منگوایا وہ پیا تو وہ بھی زخم کے راستے سے جوں کا توں نکل گیا۔ تب آپ کو یقین ہوگیا کہ موت سر پر آگئی ہے۔ آپ (رض) نے اپنے بیٹے عبداللہ کو فرمایا : دیکھو ! مجھ پر کتنا قرض ہے ؟ عبداللہ نے حساب لگایا تو وہ چھیاسی ہزار درہم کے مقروض نکلے۔ حضرت عمر (رض) نے فرمایا : دیکھ اگر آل عمر کے پاس اتنا مال ہو تو میری طرف سے یہ قرض ادا کردو۔ اگر ان کے اموال میں سے میرا قرض مکمل پورا نہ ہو تو میرے قبیلے عدی بن کعب سے سوال کرلینا پھر بھی قرض کی مکمل ادائیگی نہ ہوجائے تو پھر قریش سے سوال کرلینا اور ان کے علاوہ کسی اور سے سوال نہ کرنا اور میرا قرض ادا کردینا۔
پھر فرمایا : اے عبداللہ ! ام المومنین عائشہ (رض) کے پاس جاؤ، ان کو سلام کرکے کہو : عمر بن خطاب ہاں امیر المومنین نہ کہنا کیونکہ آج سے میں امیر المومنین نہیں رہا، آپ سے اجازت مانگتے ہیں کہ ان کو دو ساتھیوں کے ساتھ دفن کردیا جائے۔ چنانچہ عبداللہ ابن عمر (رض) حضرت عائشہ (رض) کے پاس حاضر ہوئے اور ان کو بیٹھے روتا ہوا پایا۔ عبداللہ نے ان کو سلام کہا اور فرمایا : عمر بن طاب اپنے ساتھیوں کے ساتھ دفن ہونے کی اجازت چاہتے ہیں۔ حضرت عائشہ (رض) نے فرمایا : اللہ کی قسم ! میں نے اس جگہ کو اپنے لیے کر رکھا تھا، لیکن آج میں اپنی ذات کو عمر پر ترجیح نہ دوں گی۔ چنانچہ جب حضرت ابن عمر (رض) اپنے والد کے پاس واپس حاضر ہوئے تو انھوں نے پوچھا : تمہارے پاس کیا خبر ہے ؟ ابن عمر (رض) نے عرض کیا : انھوں نے اجازت دیدی ہے۔ تب حضرت عمر (رض) نے فرمایا : میرے نزدیک اس سے بڑھ کر کوئی چیز نہیں ہے پھر تاکیداً فرمایا : (اب بھی) جب میرا انتقال ہوجائے تو مجھے چار پائی پر اٹھا کرلے جانا پھر (دوبارہ) اجازت مانگنا، کہنا : عمر بن خطاب اجازت چاہتا ہے۔ اگر وہ اجازت دیدیں تو مجھے اندر داخل کردینا اور اگر اجازت نہ دیں تو مجھے مسلمانوں کے عام قبرستان میں لوٹا دینا۔ جب حضرت عمر (رض) کا جنازہ اٹھا تو لوگوں کا یہ حال تھا گویا ان کو آج ہی سب سے بڑی مصیبت لاحق ہوئی ہے۔ چنانچہ پھر عبداللہ بن عمر (رض) نے حضرت عائشہ (رض) کے دروازے پر جاکر اجازت مانگی اور عرض کیا عمر بن خطاب اجازت چاہتا ہے۔ حضرت عائشہ (رض) نے ان کو اجازت مرحمت فرمادی۔ یوں اللہ نے عمر (رض) کو اپنے رسول اور ان کے ساتھی ابوبکر کے ساتھ جگہ دے کر ان کا بہت اکرام فرمایا۔
خلیفہ مقرر کرنا چھ افراد کی شوریٰ کا ذمہ ہے
جب حضرت عمر (رض) کی موت کا وقت قریب ہوا تھا تو لوگوں نے ان سے عرض کیا : ہمارے لیے کوئی خلیفہ منتخب فرمادیں۔ حضرت عمر (رض) نے فرمایا : میں اس منصب کا سب سے زیادہ حقدار اس چھ افراد کی جماعت میں سے ہر ایک کو سمجھتا ہوں کہ جن سے حضور (صلی اللہ علیہ وآلہ وسلم) جاتے وقت راضی تھے۔ پس ان میں سے جس کو خلیفہ بنالیا جائے وہ میرے بعد (مسلمانوں کا) خلیفہ ہوگا۔ پھر آپ (رض) نے علی، عثمان ، طلحہ، زبیر، عبدالرحمن بنعوف اور سعد بن ابی وقاص کے اسماء گرامی لیے۔ اگر امارت سعد کے حصے میں ہے تو ان کے لیے ہوگی کیونکہ میں ان کو ان کی کسی کمزوری یا خیانت کی وجہ سے (سپہ سہ لاری سے) معزول نہیں کیا تھا اور اگر کسی اور کو خلیفہ بنایا جائے تو ان میں سے ہر ایک کو خلیفہ بنایا جاسکتا ہے۔ پھر اس کی مدد حاصل کی جاسکتی ہے۔ جبکہ عبداللہ (میرا بیٹا) مشورہ کی حد تک شریک کار رہے گا۔ جبکہ وہ امارت میں کسی شے کا حقدار نہ ہوگا۔
چنانچہ جب یہ (ساتوں) حضرات جمع ہوئے تو عبدالرحمن (رض) بن عوف نے فرمایا : تم اپنے چھ میں سے تین کو چن لو۔ لہٰذا زبیر نے اپنی جگہ علی کے حق میں رائے دی ، طلحہ نے عثمان کے حق میں اور سعد نے عبدالرحمن بن عوف کے حق میں رائے دیدی۔ یوں اب انتخاب کا مرحلہ صرف تین میں رہ گیا پھر حضرت عبدالرحمن بن عوف (رض) نے فرمایا : تم میں سے کون اس (حق) سے دستبردار ہو کر مجھے انتخاب کا کام سپرد کرتا ہے ، اور میں تم کو اللہ کا واسطہ دیتا ہوں کہ میں تم میں مسلمانوں کے لیے سب سے افضل اور سب سے بہترین شخص کو چننے میں کوئی کوتاہی نہیں برتوں گا ؟ ان سب حضرات نے اثبات میں اقرار کرلیا۔ پھر حضرت عبدالرحمن نے علی (رض) کے ساتھ خلوت میں گفتگو کی اور فرمایا : آپ کی رسول اللہ (صلی اللہ علیہ وآلہ وسلم) کے ساتھ قرابت اور رشتے داری ہے اور آپ کو (اسلام میں) قدیم ہونے کی فضیلت حاصل ہے اب تم کو اللہ حاضر وناظر جان کر بولو اگر تم کو خلیفہ بنایا گیا تو تم انصاف کرو گے اور اگر عثمان کو خلیفہ بنایا گیا تو تم ان کو سنو گے اور اطاعت کرو گے ؟ حضرت علی (رض) نے فرمایا : بالکل ، پھر حضرت عبدالرحمن بن عوف (رض) نے حضرت عثمان (رض) کو خلوت میں لے جاکر پہلے کی طرح گفتگو کی حضرت عثمان (رض) نے بھی اس کا جواب اثبات میں دیا تو عبدالرحمن (رض) نے فرمایا : اپنا ہاتھ پھیلاؤ اے عثمان ! چنانچہ انھوں نے ہاتھ پھیلایا تو حضرت علی (رض) نے ان کی بیعت کرلی اور دوسرے لوگوں نے بھی بیعت کرلی۔
ابن سعد ، ابوعبید فی الاموال، ابن ابی شیبہ، البخاری، النسائی، ابن حبان، السنن للبیہقی، ابوداؤد