14246 عمرو بن میمون اودی سے مروی ہے کہ جب حضرت عمر بن خطاب (رض) کی وفات کا وقت قریب آگیا تو انھوں نے فرمایا : میرے پاس علی، طلحہ، زبیر، عثمان، عبدالرحمن بن عوف اور سعد کو بلاؤ۔ پھر آپ (رض) نے ان میں سے صرف علی اور عثمان سے بات چیت کی۔ حضرت علی (رض) کو فرمایا : اے علی ! یہ لوگ تمہاری رسول اللہ (صلی اللہ علیہ وآلہ وسلم) سے رشتے داری کو جانتے ہیں اور اللہ نے جو تم کو علم اور فقہ کی دولت بخشی ہے اس کو بھی جانتے ہیں اگر تم کو خلیفہ بنایا جائے تو تم اللہ سے ڈرتے رہنا اور بنی فلاں کو لوگوں کی گردنوں پر مسلط نہ کردینا ۔ جبکہ حضرت عثمان (رض) کو فرمایا : اے عثمان ! یہ لوگ تمہارے رسول اللہ (صلی اللہ علیہ وآلہ وسلم) کے ساتھ دامادی کے رشتے کو اور تمہاری سن رسیدگی اور شرافت و فضیلت کو بھی خوب جانتے ہیں، پس اگر تجھے اس منصب پر بٹھایا جائے تو اللہ سے ڈرنا اور بنی فلاں کو لوگوں کی گردنوں پر مسلط نہ کرنا۔ پھر حضرت عمر (رض) نے ارشاد فرمایا : میرے پاس صہیب کو بلاؤ۔ پھر ان کو فرمایا : تم تین دنوں تک نماز پڑھاتے رہنا۔ جبکہ یہ لوگ (مذکورہ) چھ حضرات ایک گھر میں تنہا ہوجائیں اور پھر جس ایک شخص پر ان کی رائے جمع ہوجائے تو اس کی مخالفت کرنے والے کی گردن اڑا دینا۔ ابن سعد، ابن ابی شیبہ