14267 عمرو بن الحارث الفہمی ، عبدالملک بن مروان سے اور وہ ابوبحریۃ الکندی سے روایت کرتے ہیں کہ حضرت عمر بن خطاب (رض) ایک مجلس کے پاس سے گزرے جس میں عثمان بن عفان، علی بن ابی طالب، زبیر بن العوام، طلحۃ بن عبیداللہ اور سعد بن ابی وقاص (رض) موجود تھے۔ حضرت عمر بن خطاب (رض) نے ارشاد فرمایا : تم میں سے ہر ایک اپنے دل میں میرے بعد حکومت کی آس باندھے بیٹھا ہے۔ حاضرین خاموش رہے۔ حضرت عمر (رض) نے پھر فرمایا : تم میں سے ہر ایک میرے بعد حکومت کی آس لگائے بیٹھا ہے۔ زبیر (رض) نے فرمایا : ہاں، ہم میں سے ہر ایک تمہارے بعد حکومت کی آس لگائے بیٹھا ہے اور وہ اس کا اہل بھی ہے۔ حضرت عمر (رض) نے فرمایا : کیا میں تم کو تمہارا حال نہ بتاؤ ؟ حاضرین چب رہے۔ حضرت عمر (رض) نے پھر فرمایا : کیا میں تم لوگوں کو تمہارا حال نہ بتاؤں ؟ حضرت زبیر (رض) نے فرمایا : بیان کر ہی دیں کیونکہ اگر ہم چپ رہیں گے پھر بھی آپ بیان کرنے سے رکیں گے نہیں ۔ حضرت عمر (رض) نے فرمایا : اے زبیر بہرحال تیرا تو یہ حال ہے تو غصہ میں کافر بن جاتا ہے، خوشی میں مومن ہوتا ہے۔ ایک دن تو شیطان ہوتا ہے اور ایک دن انسان۔ تیرا کیا خیال ہے جس دن تو شیطان ہوتا ہے اس دن خلیفہ کون بنے گا ؟ اور اے طلحہ ! رسول اللہ (صلی اللہ علیہ وآلہ وسلم) کا انتقال ہوا تو وہ تجھ پر سرزنش کرتے ہوئے گئے۔ اور اے عبدالرحمن ! تیرے پاس جو خیر (خلافت) آئے تو اس کا اہل ہے۔ اے علی ! تو صاحب الرائے آدمی ہے لیکن تیری ذات میں مزاح کی طبیعت ہے۔ اور تم میں ایک ایسا شخص ہے جس کا ایمان اگر لشکروں میں سے کسی بھی لشکر میں تقسیم کردیا جائے تو وہ ان سب کو کافی ہوجائے گا یعنی عثمان بن عفان۔ اور اے سعد ! تو صاحب مال ہے۔ ابن عساکر
کلام : مولف (رح) فرماتے ہیں عمرو بن الحارث مجہول ب عدالت شخص ہے (معلوم نہیں کہ اس کی روایت قابل سند ہے یا نہیں جبکہ ثانی الذکر امر ہی ترجیح کا متقاضی ہے) کیونکہ حضرت عمر (رض) کی نسبت یہ بات مستند اور محفوظ ہے کہ ان کے زعم میں رسول اللہ (صلی اللہ علیہ وآلہ وسلم) انتقال کے وقت مذکورہ چھ افراد سے بالکل راضی اور خوش تھے۔ جبکہ روایت مذکورہ میں اس امر کی مخالفت ہے۔