14278 ابن عمر (رض) سے مروی ہے کہ جب حضرت عمر بن خطاب (رض) کی وفات کا وقت قریب آیا تو عثمان بن عفان ، علی بن ابی طالب، عبدالرحمن بن عوف، زبیر بن العوام اور سعد بن ابی وقاص (رض) اجمعین حضرت عمر (رض) کے پاس داخل ہوئے جبکہ طلحہ ابن عبیداللہ (رض) السواد (حبشہ) سوڈان گئے ہوئے تھے۔ حضرت عمر بن خطاب (رض) نے آنے والوں پر ایک گھڑی نظر ڈالی پھر ارشاد فرمایا :
میں نے تمہارے لیے لوگوں کا معاملہ (خلافت) دیکھا، لیکن لوگوں کا کوئی اختلاف نہیں پایا اس میں کہ خلافت تم میں سے ہی کسی ایک میں ہو ۔ اگر اختلاف ہے تو وہ تمہاری طرف سے ہوگا۔ خلافت چھ میں سے کسی کے پاس جائے گی، عثمان بن عفان، علی بن ابی طالب ، عبدالرحمن بن عوف، زبیر بنالعوام ، طلحہ اور سعد ۔ لیکن تمہاری قوم تم تین میں سے کسی ایک کو خلیفہ بنائے گی : اے عثمان اگر تو خلیفہ بنے تو ابی معیط کو لوگوں کی گردنوں پر نہ بٹھانا، اے عبدالرحمن ! اگر تو لوگوں پر خلیفہ بنے تو اپنے رشتہ داروں کو لوگوں کی گردنوں پر مسلط نہ کردینا اور اے علی ! اگر تو لوگوں پر خلیفہ بنے تو بنی ہاشم کو لوگوں پر مسلط نہ کرئیے گا۔ پھر آپ (رض) نے سب کو مخاطب ہو کر ارشاد فرمایا : اٹھو اور جاکر مشاورت کرو اور کسی کو اپنے لیے خلیفہ بنالو۔ چنانچہ وہ اٹھ کر مشاورت کے لیے چلے گئے۔
عبداللہ بن عمر (رض) فرماتے ہیں مجھے عثمان نے ایک دو دفعہ بلایا، تاکہ مجھے بھی خلافت کے امر میں شامل کرلیں۔ حالانکہ (میرے والد) حضرت عمر (رض) نے میرا نام نہیں لیا تھا اور نہ اللہ کی قسم مجھے بھی بالکل چاہت تھی کہ میں ان کے ساتھ شامل ہوجاؤں، کیونکہ مجھے اپنے والد کے فرمان کی وجہ سے علم ہوگیا تھا خلافت انہی میں سے کسی کے لیے ہوگی۔ میرے باپ نے اللہ کی قسم جب بھی کسی معاملہ کے متعلق ہونٹ ہلائے وہ حقیقت کا روپ دھا کر رہا۔ لیکن جب عثمان نے مجھے بار بار بلایا تو میں نے کہا : تم لوگ عقل کیوں نہیں کرتے تم امیر بنانے چلے ہو جبکہ ابھی امیر المومنین زندہ ہیں۔ اللہ کی قسم ! گویا میں نے یہ کہہ کر عمر (رض) کو قبر سے اٹھا دیا۔ چنانچہ حضرت عمر (رض) نے ان حضرات کو فرمایا : تم لوگ ذرا ٹھہر جاؤ، جب میرے ساتھ (موت کا) حادثہ ہوجائے تب تین دنوں تک صہیب لوگوں کو نماز پڑھائے گا پھر تم تیسرے دن تک لوگوں کے معززین اور لشکروں کے امراء کو اکٹھا کرلینا اور سب کے روبرو اپنے میں سے کسی کو امیر بنالینا۔ جو بغیر مشورہ کے خود امین بن جائے اس کی گردن اڑا دینا۔ ابن عساکر