14308 عن فضیل بن غزوان عن محمد الراسبی عن بشر بن عاصم بن شقیق الثقفی کی سند سے مروی ہے۔
ہر منصب والے کو جہنم کے پل پر کھڑا کیا جائے گا
بشر بن عاصم (رض) کہتے ہیں کہ حضرت عمر بن خطاب (رض) نے ان کے لیے ایک عہدہ لکھ دیا۔ بشرکہتے ہیں میں نے عرض کیا : مجھے اس کی کوئی حاجت نہیں ہے کیونکہ میں نے رسول اکرم (صلی اللہ علیہ وآلہ وسلم) کو ارشاد فرماتے ہوئے سنا ہے :
والیوں (سرکاری مناصب پر فائز لوگوں) کو قیامت کے دن لایا جائے گا اور ان کو جہنم کے پل پر کھڑا کردیا جائے گا ، پس جو شخص اللہ کا اطاعت گزار ہوگا اللہ پاک اس کو دائیں ہاتھ سے تھام لے گا اور جہنم سے نجات دیدے گا۔ اور جو شخص اللہ کا نافرمان ہوگا جہنم کا پل اس کے نیچے سے شق ہوجائے گا اور وہ جہنم کی وادی میں گرتا چلا جائے گا جو شعلوں سے بھڑک رہی ہوگی۔
یہ سن کر حضرت عمر (رض) نے حضرت ابوذر (رض) اور حضرت سلمان (رض) کو پیغام بھیج کر بلوایا پھر حضرت ابوذر (رض) سے پوچھا : کیا آپ نے یہ حدیث رسول اکرم (صلی اللہ علیہ وآلہ وسلم) سے سنی ہے ؟ حضرت ابوذر (رض) نے فرمایا : جی ہاں۔ اور اللہ کی قسم ! اس وادی کے بعد جہنم کی آگ کی ایک اور وادی ہوگی پھر حضرت عمر (رض) نے حضرت سلمان (رض) سے پوچھا تو انھوں نے کچھ بھی جواب دینا گوارا نہ کیا۔ پھر حضرت عمر (رض) نے فرمایا : جب اس حکومت میں اس قدر سخت وعید ہے تو اس کو کون قبول کرے گا ؟ حضرت ابوذر (رض) نے عرض کیا : وہ شخص جس کی ناک اللہ نے کاٹ دی ہو اور اس کی آنکھ نکال دی ہو اور اس کا رخسار زمین کے ساتھ رگڑ دیا ہو۔ مصنف ابن ابی شیبہ، ابونعیم
فائدہ : امام ابونعیم (رح) فرماتے ہیں : اس روایت کو عمار بن یحییٰ نے عن سلمۃ بن ابی تمیم عن عطاء بن ابی رباح عن عبداللہ بن سفیان عن بشر بن عاصم کے طریق سے بھی اس کی مثل نقل کیا ہے۔ مولف سیوطی (رح) فرماتے ہیں : میں کہتا ہوں اس طریق سے ابن مندہ نے بھی اس کو نقل کیا ہے۔ پس یہ دونوں طریق تقویت دینے والے ہیں اس طریق کو جو مسند عمر میں ہے۔ امام ابن حجر الاصابہ میں فرماتے ہیں محمد الراسبی کے متعلق ابن عبدالر (رح) فرماتے ہیں وہ ابن سلیم ہے اگر واقعی ایسا ہے تو پھر مذکورہ اسناد منقطع ہے کیونکہ محمد الراسبی نے بشر بن عاصم کو نہیں پایا۔