14379 حضرت اسماء بنت یزید (رض) سے مروی ہے کہ حضرت ابوذر الغفاری (رض) رسول اکرم (صلی اللہ علیہ وآلہ وسلم) کی خدمت کیا کرتے تھے۔ جب آپ کی خدمت سے فارغ ہوتے تو مسجد میں آکر ٹھکانا کرلیتے تھے۔ یہی آپ کا گھر تھا۔ یہیں آپ آرام فرمایا کرتے تھے۔ ایک رات رسول اللہ (صلی اللہ علیہ وآلہ وسلم) مسجد میں داخل ہوئے تو حضرت ابوذر (رض) کو زمین پر لیٹا ہوا نیند پایا۔ آپ (صلی اللہ علیہ وآلہ وسلم) نے ان کو اپنے پاؤں سے جگایا۔ حضرت ابوذر (رض) سیدھے ہو کر بیٹھ گئے۔ رسول اللہ (صلی اللہ علیہ وآلہ وسلم) نے ارشاد فرمایا : کیا بات ہے میں تم کو مسجد میں سوتا ہوا دیکھ رہاہوں ؟ حضرت ابوذر (رض) نے عرض کیا : یارسول اللہ ! پھر اور کہاں سوؤں، میرا اس کے سوا کوئی ٹھکانا نہیں ہے۔ چنانچہ رسول اللہ (صلی اللہ علیہ وآلہ وسلم) ان کے پاس بیٹھ گئے اور پوچھا : اس وقت تمہارا کیا حال ہوگا جب لوگ تم کو یہاں (مدینے) سے نکال دیں گے ؟ حضرت ابوذر (رض) نے عرض کیا : تب میں ملک شام (جس میں بیت المقدس بھی شامل ہے) چلا جاؤں گا کیونکہ ملک شام کی سرزمین ہجرت کی سرزمین ہے، میدان حشر بھی وہیں ہوگا اور وہ انبیاء کی سرزمین ہے۔ چنانچہ میں بھی وہاں کا باشندہ بن جاؤں گا۔ حضور (صلی اللہ علیہ وآلہ وسلم) نے فرمایا : تب تم کیا کرو گے جب تم کو وہاں سے بھی نکال دیا جائے گا ؟ تب ہم کیا کریں ؟ حضور اکرم (صلی اللہ علیہ وآلہ وسلم) نے ارشاد فرمایا : پہلے کی بیعت کو نبھاؤ پھر اس کے بعد آنے والے کی۔ اور تمہارے ذمے ان کے حقوق کو ادا کرنا اور ان کے ذمے تمہارے جو حقوق ہیں اللہ پاک ان سے ان کے بارے میں باز پرس فرمائے گا۔ مصنف ابن ابی شیبہ