14500 حنش بن المعتمر سے مروی ہے کہ دو آدمی ایک خچر کے سلسلے میں اپنا تنازعہ حضرت علی (رض) کی خدمت میں لے کر حاضر ہوئے۔ ایک کے ساتھ پانچ گواہ تھے جو اس بات کی گواہی دے رہے تھے کہ یہ خچر اسی کے ہاں پیدا ہوا ہے۔ جبکہ دوسرا شخص دو گواہ لے کر آیا جو اس کے متعلق گواہی دے رہے تھے کہ وہ خچر اس کے ہاں پیدا ہوا ہے۔
حضرت علی (رض) نے اپنے پاس موجود حاضرین کو مخاطب ہو کر ارشاد فرمایا : تمہارا کیا خیال ہے ، اگر میں زیادہ گواہوں والے کے حق میں فیصلہ دیدوں تو ممکن ہے کہ دو گواہ پانچ گواہوں سے زیادہ بہتر ہوں۔ پھر خود ہی ارشاد فرمایا : اس مقدمے میں فیصلہ بھی ہوسکتا ہے اور دونوں آپس میں صلح بھی کرسکتے ہیں اور میں تم کو فیصلے اور صلح دونوں طریقے بتاتا ہوں ۔ صلح تو یوں ممکن ہے کہ یہ جانور دونوں کے درمیان تقسیم ہوجائے اس کے لیے پانچ حصے اور اس کے لیے دو حصے۔ جبکہ حق کے مطابق فیصلہ یوں ہوگا کہ دونوں میں سے ایک اپنے گواہوں کے ساتھ قسم اٹھائے کہ یہ اسی کا خچر ہے، اس نے اس کو فروخت کیا ہے اور نہ ہدیہ کیا ہے اور دوسرا چاہے تو اس سے سخت ترین قسم اٹھوا سکتا ہے۔ پھر یہ خچر لے لے گا۔ پھر اگر تمہارا اس بات میں اختلاف ہوتا ہے کہ قسم کون اٹھائے تو اس کا حل یہ ہے کہ میں ان دونوں کے درمیان قرعہ ڈالتا ہوں۔ جس کے نام قرعہ نکل آئے گا وہی قسم اٹھائے گا۔
حنش بن معتمر فرماتے ہیں : حضرت علی (رض) نے اسی طریقہ پر فیصلہ فرمایا اور میں اس بات پر گواہ ہوں۔
المصنف لعبد الرزاق، الکبری للبیہقی