14808 ابن عباس (رض) سے مروی ہے کہ حضرت عمر بن خطاب (رض) کے حضور میں ایک مسئلہ پیش کیا گیا۔ حضرت عمر (رض) اس کو سن کر کھڑے ہوگئے پھر بیٹھ گئے، ان کے چہرے کا رنگ بدل گیا۔ پھر آپ (رض) نے اس مسئلے کے حل کے لیے اصحاب نبی (صلی اللہ علیہ وآلہ وسلم) کو جمع کیا اور اس مسئلے کو ان پر پیش کیا اور فرمایا : تم مجھے اس کا جواب دو ۔ لوگوں نے عرض کیا : یا امیر المومنین ! آپ کی ذات مرجع الناس ہے، آپ ہی مشکل مسائل کا حل نکالنے والے ہیں۔ حضرت عمر (رض) غضب ناک ہوگئے اور ارشاد فرمایا : اللہ سے ڈرو اور درست بات کہو، اللہ تمہارے اعمال کو درست کردے گا۔ لوگوں نے عرض کیا : یا امیر المومنین ! آپ جس چیز کے بارے میں ہم سے سوال فرما رہے ہیں م اس کے متعلق کچھ نہیں جانتے۔ حضرت عمر (رض) نے فرمایا : اللہ کی قسم ! میں حقیقت کی تہہ میں اتر جانے والے اور علم کے باپ کو جانتا ہوں، وہی مرجع الناس ہے اور وہی مشکل مسائل کا حل نکالنے والا ہے، کہاں ہے وہ ؟ لوگوں نے کہا : شاید آپ کا ارادہ ابن ابی طالب کو پوچھنے کا ہے ؟ حضرت عمر (رض) نے فرمایا : ہاں اللہ کی قسم وہی ہے او واقعتہ وادیحرہ نے اس جیسا دوسرا سپوت پیدا نہیں کیا۔ چلو، ہم کو اس کے پاس سے لے چلو۔ لوگوں نے عرض کیا : یا امیر المومنین کیا آپ ان کے پاس چل کر جائیں گے ؟ وہی آپ کے پاس آجائیں گے۔ حضرت عمر (رض) نے فرمایا : افسوس ! وہ خاندان بنی ہاشم اور خاندان رسول کے چشم وچراغ ہیں اور علم کا نشان ہیں۔ ان کے پاس چل کر جایاجاتا ہے، وہ خود نہیں آتے۔ انہی کے گھر میں حکام پیش ہوتے ہیں۔ چلو ان کا رخ کرو۔
چنانچہ یہ حضرات ان کی تلاش میں نکلے تو ان کو اپنے باغ میں پایا۔ وہ اس آیت کی بار بار تلاوت کررہے تھے اور رو رہے تھے :
ایحسب الانسان ان یترک سدی۔
کیا انسان گمان کرتا ہے کہ اس کو بےکار چھوڑ دیا جائے گا۔
حضرت عمر (رض) نے قاضی شریح کو فرمایا : تم نے جو مسئلہ ہم کو سنایا ہے وہ ابوالحسن کو سناؤ۔ قاضی شریح نے فرمایا : میں عدالت نشست میں تھا۔ یہ آدمی آیا اور اس نے کہا کہ :
ایک آدمی نے اس کو دو عورتیں حوالہ کیں جن میں ایک آزاد ہے اور مہر والی تھی جبکہ دوسری ام ولد (باندی) تھی۔ اور اس کو کہا کہ میری واپسی تک ان کے خرچ پانی کا خیال رکھو۔ پھر گزشتہ رات دونوں نے ایک ساتھ بچوں کو جنم دیا۔ ایک نے لڑکی جنی دوسری نے لڑکا جنا۔ لیکن اب دونوں ہی (دگنی) میراث کے لالچ میں لڑکے کا دعویٰ کررہی ہیں اور لڑکی کو کوئی بھی قبول نہیں کررہی ہے۔
حضرت علی (رض) نے قاضی شریح سے پوچھا : تم نے دونوں کے درمیان کیا فیصلہ کیا ؟ قاضی شریح نے کہا : اگر میرے پاس ایسا علم ہوتا جس کے ذریعہ میں دونوں کے بیچ فیصلہ کرسکتا تو ہرگز ان کو آپ کے پاس نہ لے کر آتا۔
دو عورتوں کے درمیان فیصلہ
چنانچہ حضرت علی (رض) نے ایک تنکا اٹھا کر ارشاد فرمایا : یہ مسئلہ اس تنکے سے بھی زیادہ آسان ہے۔ پھر آپ (رض) نے ایک پیالہ منگوایا اور ان میں سے ایک عورت کو فرمایا : اس میں اپنا (سارا ) دودھ نکالو۔ چنانچہ اس نے اپنا دودھ اس پیالے میں نکالا۔ حضرت علی (رض) نے اس کا وزن کرلیا۔ پھر دوسری عورت کو فرمایا : اب تم اپنا دودھ نکالو۔ چنانچہ اس نے بھی اپنے پستانوں کا دودھ نکالا پھر حضرت علی (رض) نے اس کو بھی وزن کیا تو اس کو پہلی عورت کے دودھ سے نصف پایا۔ چنانچہ اس دوسری عورت کو فرمایا : تو اپنی بیٹیے لے لے۔ اور پہلی کو فرمایا : تو اپنا بیٹا لے لے۔
پھر قاضی شریح کو فرمایا : کیا تم کو معلوم نہیں کہ لڑکی کا دودھ لڑکے کے دودھ لڑکے کے دودھ سے نصف ہوتا ہے۔ لڑکی کی میراث لڑکے کی میراث سے نصف ہوتی ہے ، لڑکی کی عقل لڑکے کی عقل سے نصف ہوتی ہے ، لڑکی کی شہادت لڑکے کی شہادت سے نصف ہوتی ہے، لڑکی کی دیت لڑکے کی دیت سے نصف ہوتی ہے بلکہ لڑکی ہر چیز میں لڑکے سے نصف ہوتی ہے۔
یہ فیصلہ سن کر (خوشی کے باعث) حضرت عمر (رض) کو سخت ترین حیرت اور تعجب ہوا۔ پھر ارشاد فرمایا : اے ابوحسن ! اللہ مجھے ایسے کسی مشکل مسئلہ میں آپ کے بغیر تنہا نہ چھوڑے جس کو میں حل کرنے کا اہل نہیں اور نہ ایسے شہر میں چھوڑے جس میں آپ نہ ہوں۔
ابو طالب علی بن احمد الکاتب فی جزء من حدیثہ
کلام : روایت محل کلام ہے۔ مذکورہ روایت میں ایک راوی یحییٰ بن عبدالحمید الحمانی ہے۔ المغنی میں ہے کہ اس کو ابن معین نے ثقہ کہا ہے، جبکہ ابوداؤد نے اس کو ضعیف کہا ہے اور محمد بن عبداللہ بن خمیر نے کذاب کہا ہے۔ ابن حبان کہتے ہیں : یہ شخص کھلا جھوٹ بولتا ہے اور احادیث میں سرقہ (چوری) کرتا ہے۔ ابن عدی نے کہا کہ میرا خیال ہے کہ اس کی روایت میں کوئی حرج نہیں ہے۔ امام ذہبی (رح) فرماتے ہیں : اس کا تشیع غلو کی حد تک تھا اور وہ معاویہ (رض) کی تکفیر کرتا تھا۔