14512 زربن حبیش سے مروی ہے کہ دو آدمی کھانا تناول کرنے کے لیے بیٹھے ایک کے پاس پانچ روٹیاں تھیں، دوسرے کے پاس تین روٹیاں تھیں۔ جب دونوں کھانا اپنے سامنے رکھ لیا تو ایک آدمی نے ان کے پاس سے گزرتے ہوئے ان کو سلام کیا۔ دونوں نے اس کو کھانے کی دعوت دی۔ لہٰذا وہ بیٹھ گیا اور تینوں نے مل کر آٹھ روٹیاں کھالیں۔ کھانے سے فراغت پر آدمی اٹھ گیا اور آٹھ درہم ان کو دے کر بولا یہ لو تمہارا بدلہ جو میں نے تمہارے ساتھ کھانا کھایا ہے اس کا۔ دونوں کا اختلاف ہوگیا۔ پانچ روٹیوں والے نے کہا : میرے پانچ درہم ہیں اور تیرے تین درہم ۔ تین روٹیوں والے نے کہا : میں راضی نہیں ہوں، الایہ کہ سارے درہم دونوں کے درمیان نصف نصف ہوں گے۔ چنانچہ دونوں اپنا مقدمہ حضرت علی (رض) کے پاس لے گئے۔ دونوں نے اپنا قصہ حضرت علی (رض) کی خدمت میں پیش کیا۔ حضرت علی (رض) نے تین روٹیوں والے کو فرمایا : تیرے ساتھی نے جو حصہ تجھے پیش کیا ہے وہ تمہارے لیے بہت ہے۔ حالانکہ اس کی روٹیاں تمہاری روٹیوں سے زیادہ تھیں۔ تم تین روٹیوں پر راضی ہوجاؤ۔ اس نے جواب دیا : اللہ کی قسم ! میں حق کے بغیر راضی نہ ہوں گا۔ حضرت علی (رض) نے ارشاد فرمایا : حق میں تو تمہارے صرف ایک درہم ہے جبکہ اس کے سات درہم ہیں۔ آدمی نے کہا : سبحان اللہ ! حضرت علی (رض) نے فرمایا : ہاں حق یہی ہے۔ آدمی نے کہا : تب مجھے حق سمجھائیے تاکہ میں اس کو قبول کرلوں۔ حضرت علی (رض) نے فرمایا : کیا آٹھ روٹیوں کے چوبیس تہائی نہیں بنتے جو تم تینوں نے مل کر کھائے ہیں۔ اس تم میں سے زیادہ اور کم کھانے والا معلوم نہیں ہوسکتا۔ اس لیے یہ فرض کیا جائے گا کہ تم تینوں نے برابر برابر کھایا ہے۔ لہٰذا تو نے بھی آٹھ تہائی حصے کھائے حالانکہ تیری تین روٹیوں کے نو حصے بنتے تھے اور تیرے دوسرے ساتھی نے بھی آٹھ حصے کھائے جبکہ اس کی پانچ روٹیوں کے پندہ حصے بنتے تھے اس کے سات حصے بچ گئے اور تیرا ایک حصہ بچا۔ لہٰذا تجھے ایک حصہ کے بدلے ایک درہم ملے گا اور اس کو سات حصوں کے عوض سات درہم ملیں گے۔ تب آدمی بولا اب میں (ایک درہم ہی پر) راضی ہوں۔
الحافظ جمال الدین المزی فی تھذیبہ