14525 شعبی (رح) سے مروی ہے کہ کھجور کے ایک ذخیرے کے بارے میں ابی بن کعب اور عمر بن خطاب (رض) کا تنازعہ کھڑا ہوگیا۔ ابی (رض) روپڑے اور بولے : تیری تو بادشاہی ہے (فیصلہ انصاف کس سے ملے گا) حضرت عمر (رض) نے فرمایا : میں اپنے اور تمہارے درمیان کوئی مسلمان ثالث (فیصلہ کرنے والا) مقرر کرلیتا ہوں۔ ابی (رض) نے فرمایا : زید ٹھیک ہیں۔ حضرت عمر (رض) بھی راضی ہوگئے۔ چنانچہ دونوں چل کر زید (رض) کی خدمت میں پہنچے۔ زید (رض) خلیفہ کو دیکھ کر اپنی مسند سے ہٹ گئے۔ حضرت عمر (رض) نے فرمایا : ان کے گھر میں فیصلہ طلب کرنے آئے ہیں۔ تب زید (رض) پہچان گئے کہ یہ دونوں بزرگ اپنا کوئی مقدمہ ان کے پاس لے کر آئے ہیں۔ حضرت عمر (رض) نے ابی کو فرمایا : بیان کرو۔ حضرت ابی (رض) نے واقعہ بیان کیا۔ حضرت عمر (رض) نے ان کو فرمایا : یاد کرو ، شاید تم کچھ بھول رہے ہو، چنانچہ ابی (رض) کو یاد آگیا اور انھوں نے مزید کچھ بیان کیا پھر کہا اور کچھ مجھے یاد نہیں۔ پھر حضرت عمر (رض) نے واقعہ بیان کیا۔ دونوں کی بات سننے کے بعد حضرت زید (رض) نے فرمایا : اے ابی تم اپنے گواہ پیش کرو حضرت ابی (رض) نے فرمایا : میرے پاس کوئی گواہ نہیں ہے۔ تب زید (رض) نے فرمایا : تو امیر المومنین کو قسم کھانے سے معاف رکھو۔ حضرت عمر (رض) نے فرمایا امیر المومنین کو ہرگز معاف نہ کرو اگر تم سمجھتے ہو کہ ان پر قسم آتی ہے۔ ابن عساکر