14537 ہمیں معمر نے عاصم سے روایت کیا، عاصم نے شعبی سے روایت کیا، شعبی نے قتادہ (رض) سے روایت کیا اور قتادہ نے بیان کیا کہ :
ایک آدمی حضرت ابن مسعود (رض) کے پاس آیا اور ان سے ایک عورت کے متعلق مسئلہ دریافت کیا جس کا شوہر اس حال میں انتقال کر گیا کہ اس نے اپنی اس عورت کے مباشرت (جماع) نہیں کیا تھا۔ اور نہ اس کے لیے کچھ (مہر وغیرہ) مقرر کرکے گیا۔ حضرت ابن مسعود (رض) نے اس کو فرمایا : تم یہ سمئلہ اور لوگوں سے دریافت کرلو، کیونکہ بتانے والے لوگ بہت ہیں۔ آدمی نے کہا : اللہ کی قسم ! اگر مجھے سال بھر بھی ٹھہرنا پڑا تب بھی میں کسی اور سے سوال نہ کروں گا۔ آخر ابن مسعود (رض) نے اس کو مہینہ بھر پھرایا۔ پھر ایک دن حضرت ابن مسعود (رض) کھڑے ہوئے، وضو کیا پھر دو رکعات نماز ادا کی اور یہ دعا کی :
اللھم ما کان من صواب فمنک وما کان خطافمنی۔
اے اللہ ! جو درست ہو وہ تجھ سے ہے اور غلط ہو تو میری طرف سے ہے۔
پھر ارشاد فرمایا : میرا خیال ہے کہ اس عورت کو اس آدمی کی دوسری عورت جتنا مہر دیا جائے گا اور اس کے ساتھ ساتھ اس کو اس کی میراث بھی ملے گی نیز اس پر عدت گزارنا بھی لازم ہوگی۔ یہ سن کر آدمی جوش سے اٹھ کھڑا ہوا اور بولا : میں شہادت دیتا ہوں کہ آپ نے بالکل رسول اللہ (صلی اللہ علیہ وآلہ وسلم) جیسا فیصلہ کیا ہے جو انھوں نے بروع بنت واشق کے بارے میں کیا تھا اور وہ ھلال بن امیہ کی بیوی تھی۔ حضرت ابن مسعود (رض) نے ارشاد فرمایا : تیرے سوا یہ فیصلہ کسی اور نے بھی سنا تھا ؟ عرض کیا : جی ہاں، پھر وہ اپنے ساتھ اپنی قوم کے کئی افراد کو لے کر حاضر ہوا اور انھوں نے بھی اس بات کی شہادت دی۔ چنانچہ لوگوں نے ابن مسعود کو کسی اور چیز پر اتنا خوش نہیں دیکھا جتنا وہ اس بات پر خوش ہوئے کہ ان کا فیصلہ رسول اللہ (صلی اللہ علیہ وآلہ وسلم) کے فیصلے کے موافق ہوگیا۔
فائدہ : مذکورہ روایت ابوداؤد نے کتاب النکاح باب فیمن تزوج ولم یسم صدقاً حتیٰ مات، رقم 210, 2, 2100 پر قریب قریب انہی الفاظ کے روایت کی ہے۔ نیز دیکھئے سنن الترمذی رقم 1145 ۔ امام ترمذی (رح) فرماتے ہیں ابن مسعود (رض) کی حدیث حسن صحیح ہے۔