14536 ام سلمہ (رض) سے مروی ہے کہ دو انصاری آدمی رسول اللہ (صلی اللہ علیہ وآلہ وسلم) کے پاس اس میراث کے متعلق اپنا جھگڑا لے کر حاضر ہوئے جو پرانی ہوچکی تھی اور نہ ہی ان کے پاس کوئی گواہ تھے۔ نبی اکرم (صلی اللہ علیہ وآلہ وسلم) نے ارشاد فرمایا : تم میرے پاس اپنا جھگڑا لے کر آئے ہو اور جن چیزوں میں مجھ پر وحی نازل نہیں ہوتی میں ان میں اپنی رائے کے ساتھ فیصلہ کردیتا ہوں۔ پس یاد رکھو میں جس کی حجت کو دیکھ کر ایسا فیصلہ کردوں جس سے وہ اپنے بھائی کے حق کو ہتھیار لے تو وہ ہرگز اس کو وصول نہ کرے کیونکہ درحقیقت میں اس کے لیے جہنم کی آگ کا ایک ٹکڑا نکال دیتا ہوں۔ جس کو وہ قیامت کے دن اپنی گردن میں ڈالے ہوئے آئے گا۔ یہ سن کر دونوں آدمی رو پڑے اور دونوں میں سے ہر ایک بول اٹھا : یارسول اللہ ! میرا حق اس کو آیا۔ نبی اکرم (صلی اللہ علیہ وآلہ وسلم) نے ارشاد فرمایا : جب تم نے یہ اچھا فیصلہ کر ہی لیا ہے تو جاؤ اور بھائی چارگی کے ساتھ حق کو تقسیم کرو اور قرعہ ڈال کر حصہ تقسیم کرلو اور پھر ہر ایک دوسرے کے لیے لیا دیا حلال کردے۔
مصنف ابن ابی شیبہ، ابوسعید النقاش فی القضاۃ