١٥٣١۔۔ محمد بن عثمان بن حوشب اپنے والد عثمان سے اور عثمان محمد کے دادا یعنی اپنے والد سے روایت کرتے ہیں کہ جب اللہ نے محمد کو ظاہر فرمادیا تو میں نے چالیس شہسواروں کا دستہ عبدشر کی ہمراہی میں آپ کی خدمت میں بھیجا۔ یہ قافلہ مدینہ پہنچاتوعبد شر نے اصحاب کرام سے کہا کہ تم میں سے محمد کون ہے۔ صحابہ نے آپ کی طرف اشارہ فرمادیا۔ عبدشر نے کہا کہ آپ فرمائیے کہ ہمارے پاس کیا لائے ہیں ؟ اگر وہ سچ ہواتوہم آپ کی اتباع کریں گے آپ نے فرمایا نماز، قائم کرو، زکوۃ ادا کرو، جانوں کا احترام کرو، امربالمعروف نہی عن المنکر کرو، عبد شر نے کہا بیشک یہ چیز تو بہت اچھی ہے لائیے اپنا ہاتھ دراز کیجئے۔ تاکہ میں آپ سے بیعت ہوجاؤں ، آپ نے فرمایا تیرا نام کیا ہے عرض کیا عبد شر یعنی شر کا بندہ۔ آپ نے فرمایا نہیں تم عبد خیرہو یعنی خیر کے بندے ہو۔ پھر آپ نے عبد خیر کو حوشب ذی ظلیم کے لیے جواب لکھواکر بھیجا توحوشب بھی ایمان لائے۔ ابن مندہ ابن عساکر۔
ابن عساکر فرماتے ہیں کہ حوشب ذی ظلیم نے نبی کریم کا مبارک زمانہ توپایا لیکن زیارت سے مشرف نہ ہوسکے۔ حضور نے ان کے ساتھ بذریعہ جریر بن عبداللہ مراسلت بھی فرمائی۔ اور انھوں نے نبی کریم سے مرسلاروایت کیا ہے۔ ابن عساکر (رح) ، احمد (رح) بن محمد بن عیسیٰ سے روایت کرتے ہیں آگے فرماتے ہیں کہ احمد بن محمد نے ذی ظلیم الھانی ھوشب کو حضور کے زمانہ سے متصل طبقہ محدثین میں شمار کیا اور فرمایا کہ یہ حضرت ابوبکر کے دور خلافت میں آپ کے پاس حاضر ہوئے اور چونکہ نبی کریم ان کی تعریف فرماگئے تھے تو اس حوالہ سے حضرت ابوبکر نے ان کو پہچان لیا۔