١٥٣٢۔۔ ایاس بن سلمہ اپنے والد سلمہ سے روایت کرتے ہیں کہ قریش نے خارجہ بن کر زکو بطور ہراول دستہ کے آپ کی طرف بھیجا تاکہ آپ کی عسکری قوت کے احوال و کوائف لے کر آئے۔ تو یہ اس مہم سے واپس آیا اور آپ اور آپ کی عسکری کی مدح وثنا کرنے لگا قریش نے اس کو کہا کہ تو ایک دیہاتی آدمی ہے انھوں نے اپنا اسلحۃ وغیر کی جھنکار سے تجھے مرعوب کرلیا اسی میں تیرا دل اڑ کیا ہے پھر قریش نے عروہ بن مسعود کو اس غرض کے لیے بھیجا ۔ یہ آکر آپ سے مخاطب ہوا اور کہنے لگا اے محمد یہ کیا بات ہے ؟ تم اللہ کی طرف دعوت دیتے۔۔ اور اپنی قوم کے پاس اوباش قسم کے لوگوں کا نبوہ جمع کر لائے ہو ؟ کوئی پتہ نہیں وہ کون ہیں کون نہیں ہیں۔ اس کا مقصد اس کے سوا کچھ نہیں کہ اس طرح تم صلہ رحمی کا ناطہ توڑو اور اہل قرابت کی حرمتوں کی پامال کرو ان کی جانوں اور مالوں سے کھیلو۔
حضور نے اس کے جواب میں ارشاد فرمایا بلکہ میری آمد کا مقصد اس کے سوا کچھ نہیں کہ میں ٹوٹے ہوئے رشتوں کو پھر سے جوڑؤں اور یہ کہ اللہ ان میری قوم والوں کو ان کے دین سے بہتر دین مرحمت فرمائے اور ان کو ان کی معیشت سے اعلی معیشت عطا فرمائے۔ یہ شخص بھی بالآخر آپ کی مدح وثنا گاتے ہوئے واپس پہنچا۔
حضرت سلمہ فرماتے ہیں کہ اس واقعہ کے بعد ان مسلمان قیدیوں پر جو مشرکین کے ہاتھوں میں تھے ظلم وستم کی چکی سخت ہوگئی تو حضور نے حضرت عمر کو بلایا اور پوچھا اے عمر کیا تم اپنے مسلمان قیدی بھائیون کو میرا پیغام پہنچاسکتے ہو ؟ آپ (رض) نے عرض کیا یارسول اللہ نہیں کیونکہ اللہ کی قسم مکہ میں مجھ سے بڑے خاندان کوئی نہیں ہے اور میری وجہ سے ان کو گزند پہنچنے کا قوی امکان ہے پھر آپ نے حضرت عثمان کو بلا کر اس مہم پر روانہ فرمایا۔ حضرت عثمان اپنی سواری پر سوار ہو کر مشرکین کے لشکر میں جاپہنچے مشرکین نے آپ کے ساتھ نازیبا برتاؤ کیا اور آپ کو برابھلا کہناشروع کردیا۔ پھر آپ کے چچازاد ابان بن سعید نے آپ کو پناہ دیدی۔ اور اپنے پیچھے زین پر بٹھایا پھر آپ کے اترنے پر آپ کے چچازاد نے کہا اے ابن عم۔ کیا بات ہے کہ میں تمہیں بہت زیادہ منکسرالمزاج دیکھ رہاہوں کہ تم نے اپنے ازار کو بہت اونچا کررکھا ہے اور حضرت عثمان کا ازار اس وقت نصف پنڈلیوں تک تھا تو حضرت عثمان نے فرمایا میرے ساتھ حضور کا ازار اسی طرح ہوتا ہے۔ پھر آپ نے مکہ میں کسی مسلمان قیدی کو آپ کا پیغام پہنچائے بغیر نہ چھوڑا۔
حضرت سلمہ فرماتے ہیں کہ ادھرہم لوگ دوپہر کے وقت قیلولہ کررہے تھے کہ رسول اللہ کے منادی نے نداء دی کہ اے لوگو بیعت کی طرف بڑھو، بیعت کی طرف بڑھو، جبرائیل امین کوئی حکم خداوندی لے کر اترے ہیں، توہم رسول اللہ کی طرف تیزی سے لپکے آپ ببول کے درخت کے سایہ میں تھے تو وہیں ہم آپ سے بیعت ہوئے اور یہی واقعہ ہے جس کے متعلق فرمان الٰہی ہے۔ لقد رضی اللہ عن المومنین اذ یبایعونک تحت الشجرۃ۔ اے پیغمبر جب مومن تم سے درخت کے نیچے بیعت ہورہے تھے تو اللہ ان سے خوش ہوا۔
حضرت سلمہ فرماتے ہیں کہ اس بیعت میں آپ نے حضرت عثمان کی جانب سے اپنے ایک ہاتھ پر دوسرے ہاتھ سے بیعت لی لوگوں نے کہا ابوعبداللہ حضرت عثمان (رض) کو مبارک ہو کہ وہ تو بیت اللہ کے طواف میں مشغول ہوں گے اور ہم ادھر اس سعادت سے محروم ہیں رسول اللہ نے فرمایا اگر وہ اتنے سالوں تک بھی وہاں ٹھہرتے رہیں۔۔ پھر بھی میرے بغیر ہرگز طواف نہ کریں گے۔ رواہ ابن ابی شیبہ۔