١٥٦٠۔۔ محمد بن زکریا، العلائی سے مروی ہے کہ ہم کو عباس بن البکار نے بیان کیا وہ حضرت عکرمہ سے روایت کرتے ہیں کہ جب حضرت علی جنگ صفین سے واپس تشریف لائے تو آپ کے اصحاب میں سے ایک شیخ نے کھڑے ہو کر سوال کیا اے امیرالمومنین ہمیں بتائیے کہ کیا ہمارا شام کی طرف یہ سفر کرنا قضاوقدر کے موجب تھا ؟ فرمایا قسم ہے اس ہستی کی جس نے دانے کو چاک کیا جان کو پیداکیاہم نے کوئی وادی طے کی اور نہ کوئی ٹیلہ عبور کیا مگر سب قضا وقدر کے موجب تھا، شیخ نے عرض کیا پھر تو میں اللہ کے ہاں اپنی جہد وسعی پر ثواب کی امید رکھتاہوں۔ حضرت علی نے فرمایا بلکہ اللہ تمہارے کسی بلندی کو عبور کرنے اور کسی نشیب میں اترنے پر بھی اجرعظیم مرحمت فرمائیں گے اور یہ یاد رکھو، کہ تم اپنے کسی بھی معاملہ میں کراہت وجبرا مصروف نہیں کیے جاتے اس پر شیخ نے عرض کیا اے امیرالمومنین تو کیا قضاوقدر ہم کو اس طرف نہیں کھینچتی۔ فرمایا افسوس شاید کہ تم اس کو قضا لازمی اور تقدیر حتمی سمجھ بیٹھے ہو ؟ اگر یہ بات ہوتی تو خوش خبری ووعید کالعدم ہوجاتیں، اور کارخانہ ثواب عذاب بےکار ہوجاتا۔ اور اللہ کی طرف سے کسی گناہ گار پر کوئی ملامت ہوتی اور نہ ہی کسی محسن پر کوئی مدحت ہوتی اور کوئی محسن احسان کی وجہ سے گناہ کی بجائے ثواب کا زیادہ مستحق نہ ہوتا۔ لہذایہ بات کہ انسان مجبور محض ہو کرعمل سرانجام دیتا ہے بتوں کے پجاریوں کی بات ہے۔ اور شیطان کے کارندوں رحمان کے دشمنوں کی بات ہے اور یہ لوگ اس امت کے مجوسی اور قدریہ ہیں حقیقت یہ ہے کہ اللہ نے خیر کا اختیار نہ بخشا اور شر سے ڈرایا۔ اور کسی کو مغلوب وبے بس کرکے گناہ کروایا اور نہ ہی کسی سے جبرا اطاعت کروائی۔ اور نہ کسی کو مکمل مالک بنایا، اور نہ آسمان و زمین میں ان میں نظر آنے والی اشیاء کو بےمقصد پیدا کیا۔ یہ خیال کہ سب یونہی بےمقصد ہے اور حساب کتاب کا وجود نہیں ان لوگوں کا ہے جو کفر کے مرتکب ہوئے سو ہلاکت ہے ان لوگوں کے لیے جو جہنم کے انکار ہیں شیخ نے عرض کیا یا امیرالمومنین پھر کیا ہماری یہ آمدورفت قضاقدر تھی ؟ فرمایا یہ اللہ کا امر اور اس کی حکمت تھی پھر آپ نے یہ آیت تلاوت فرمائی۔
وقضی ربک الاتعبدوا الاایاہ۔ تیرے رب نے فیصلہ کیا ہے کہ تم محض اس کی پرستش کرو۔ ابن عساکر۔ اس روایت کے دونوں راوی محمد بن زکریا، العلائی، اور عباس بن البکار کذاب ہیں۔