١٥٦١۔۔ حارث (رح) سے مروی ہے کہ ایک شخص حضرت علی کی خدمت میں آیا اور عرض کیا اے امیرالمومنین مجھے تقدیر کے متعلق کچھ بتا دیجئے فرمایا، یہ انتہائی تاریک راہ ہے ، اس پر مت چل۔ عرض کیا اے امیرالمومنین مجھے تقدیر کے متعلق کچھ بتا دیجئے ، فرمایا یہ اتھاہ گہرائیوں والا سمندر ہے اس میں مت گھس عرض کیا اے امیرالمومنین مجھے تقدیر کے متعلق کچھ بتا دیجئے یہ اللہ کا راز ہے ، اس سے پردہ اٹھانے کی کوشش مرت کر، عرض کیا اے امیرالمومنین مجھے تقدیر کے متعلق کچھ بتا دیجئے فرمایا اے سائل اچھا بتا جیسے پروردگار نے چاہا تجھے پیدا کیا یا جیسے تو نے چاہا پیدا کیا، عرض کیا جی سے اللہ نے چاہا پیدا کیا فرمایا اور جیسے اللہ نے چاہا تجھے کام میں لگایا یا جیسے تو نے چاہا اللہ نے کام میں لگایا، عرض کیا جیسے اس نے چاہاکام میں لگادیا، فرمایا قیامت کے رو ز جس حالت میں وہ چاہے گا تجھے اٹھائے گا یا جس حالت میں توچا ہے گا ویسے اٹھائے گا، عرض کیا جس حالت میں وہ چاہے گا اٹھائے گا حضرت علی نے پھر فرمایا اے سائل بتا کیا تو اللہ سے جو تیرا رب ہے عافیت مانگتا ہے یا نہیں ؟ عرض کیا ضرور۔ فرمایا تو کس چیز سے عافیت مانگتا ہے آیا اس مصیبت سے جس نے تجھے گھیر رکھا ہے یا اس مصیبت سے جس نے کسی اور کو پریشان کررکھا ہے ؟ عرض کیا اس مصیبت سے جس نے مجھے گھیر رکھا ہے پھر فرمایا اے سائل تیرا اعتقاد ہے کہ گناہ سے بچنے کی طاقت اور نیکی پر عمل پیرا ہونے کی قوت صرف اس ہستی کی بدولت ہے بتاوہ کون سی ہے ہستی ؟ عرض کیا اللہ جو عالی شان اور عظیم المراتبت ہے فرمایا بس اسی کی تفسیر جان لے تیرا مقصود حل ہوجائے گا، عرض کیا اے امیرالمومنین اللہ نے جو آپ کو سکھایا مجھے بھی سکھا دیجئے فرمایا اس کی تفسیر یہ ہے کہ بندہ کو اطاعت خداوندی کی قدررت ہے اور نہ ہی معصیت خداوندی کی قوت وہ دونوں معاملوں میں اللہ کا محتاج ہے۔ اے سائل بتا کیا اللہ کی مشیت و ارادے کے ساتھ تیری مشیت بھی شامل ہے پھر اگر تو کہتا ہے کہ تیری مشیت بھی اللہ کی مشیت کے تابع ہے تو بس تجھے اپنی مشیت مشیت ایزدی کی طرف سے کفایت کرے گی اور اگر خدانخواستہ تیرا یہ خیال ہے کہ تیری مشیت مستقل بالذات ہے جس میں خدائی مشیت کو کوئی دخل نہیں پھر تو یقیناً اللہ کے ساتھ اس کی مشیت میں دعوی شرک کا مرتکب ہوچکا ہے۔ اے سائل اللہ ہی زخمی کرتا ہے پھر وہی اس کی دوا کرتا ہے تو دوا کا سرچشمہ وہی ہے تو دوا و مرض بھی اسی کی طرف سے ہے پھر حضرت علی نے سائل سے دریافت کیا کیا اب اللہ کے امر قدرت کو سمجھے ؟ شیخ نے کہا جی بالکل۔ پھر آپ نے دیگر حاضرین کو مخاطب ہو کے فرمایا اب جا کے تمہارا بھائی مسلمان ہوا ہے اٹھو اور اس سے مصافحہ کرو۔ پھر حضرت علی نے فرمایا اگر میرے پاس کوئی قدری شخص وہ جس کا عقیدہ ہو کہ انسان مجبور محض ہے ہوتا تو میں اس کی گردن دبوچتا۔۔ اور اس کو گلا گھونٹنے گھونٹتے مارڈالتا کیونکہ بیشک یہ لوگ اس امت کے یہودی، نصرانی اور مجوسی ہیں۔ ابن عساکر۔