1596 ۔۔ از مسند رافع بن خدیج (رض) ، عمرو بن شعیب سے مروی ہے کہ میں حضرت سعید بن المسیب کے پاس بیٹھا تھا کہ اصحاب مجلس نے ایک قوم کا ذکر چھیڑا اس کا کہنا ہے کہ اللہ نے اعمال کے ماسواہرچیز کو مقدر فرمایا ہے۔ عمرو کہتے ہیں کہ اللہ کی قسم میں نے حضرت سعید بن المسیب کو اس وقت سے زیادہ غضبناک کبھی نہیں دیکھا۔۔ حتی کہ آپ نے شدت غضب سے کھڑے ہونے کا ارادہ فرمایا، لیکن پھر ٹھنڈے ہوگئے۔ اور فرمایا ان کو کہو کہ مجھے رافع بن خدیج نے بیان کیا کہ انھوں نے نبی کریم کو فرماتے ہوئے سنا کہ میری امت میں سے ایک قوم ہوگی جو اللہ اور قرآن کا انکار کرے گی لیکن ان کو اس بات کا شعور بھی نہ ہوگا، جس طرح یہود و نصاری نے کفر کا ارتکاب کیا رافع کہتے ہیں کہ میں نے عرض کیا یارسول اللہ میں آپ پر فداء ہوں یہ کس طرح ہوگا فرمایا وہ بعض تقدیر کا اقرار کریں گے تو بعض کا انکار کریں گے میں نے عرض کیا وہ کیا کہیں گے فرمایا خیر اللہ کی طرف سے ہے اور شر ابلیس کی طرف سے، اور پھر وہ اس قرآن کو پڑھیں گے اور اس سے غلط استدلال کریں گے اور یوں وہ ایمان معرفت کے بعد قرآن کا بھی انکار کریں گے اس میں میری امت کو ان کی طرف سے بغض و عداوت اور جنگ وجدال بھی پیش آئے گی یہ اپنے وقت میں اس امت کے زندیق لوگ ہوں گے سلطان وقت کا ظلم وستم ان کا سایہ اور پناہ گاہ ہوگا، پھر اللہ ان پر طاعون کی وبا مسلط فرمادیں گے جو ان کی کثرت کو فناء کردے گی پھر ان کو زمین میں دھنسادیا جائے گا، اور بہت کم اس سے بچ سکیں گے مومن اس وقت قلیل تعداد میں ہوں گے۔
ان کی خوشی بھی شدت غم سے عبارت ہوگی پھر اللہ ان اکثر منکرین کی صورتوں کو بندروں اور خنزیروں کی صورت سے مسخ فرمادیں گے پھر اسی حالت میں خروج دجال ہوگا پھر آپ روپڑے ہم بھی آپ کے رونے کی وجہ سے روپڑے اور عرض کیا آپ کو کیا چیز رلارہی ہے فرمایا ان کی بیخ کنی پر رحم کھاتے ہوئے کہ ان مبتلائے عذاب میں تہجد گزار عبادت کرنے والے بھی ہوں گے اور یہ پہلے لوگ نہ ہوں گے جنہوں نے تقدیر کے انکار میں یہ بات کہی ہوگی جس کے بوجھ کو اٹھاتے ہوئے ان کے ہاتھ شل ہوگئے بلکہ اکثر اسرائیل تقدیر کے جھٹلانے کی وجہ سے ہی گرفتار ہلاکت ہوئے کہا یارسول اللہ میں آپ پر فداء ہوجاؤں مجھے بتائیے کہ کیسے تقدیر پر ایمان لایا جائے ؟ فرمایا اللہ وحدہ پر ایمان لاؤ، اور اس بات پر کہ اس کے ساتھ کوئی بھی ضرر ونفع رسائی کا مالک نہیں ہے اور جنت وجہنم پر ایمان لاؤ۔ اور اس بات پر ایمان لاؤ کہ اللہ نے تخلیق خلق سے قبل ہی تقدیر کو پیدا فرمادیا تھا، پھر مخلوق کو پیدا فرمایا، اور جس کو چاہا جنت کا اہل بنایا اور جس کو چاہا جہنم کا اہل بنادیا، اور یہ بلاشک وشبہ اس کی طرف سے سراسر عدل و انصاف ہے اور ہر ایک اسی پر عمل پیرا ہے جو اس کے لیے طے ہوچکا ہے اور وہ اپنی تقدیر کی طرف بڑھتاجارہا ہے میں نے عرض کیا اللہ اور اس کے رسول نے بالکل سچ فرمایا۔
علامہ طبرانی (رح) نے اس کو عمرو بن شعیب سے دوطریق کے ساتھ روایت فرمایا۔ پہلے میں حجاج بن نصیر ضعیف ہے۔ اور دوسرے میں ابن لہیعہ ہے سو حدیث حسن ہے۔ اور حارث عقیلی نے اس کو دوسرے طریق کے ساتھ انہی سے روایت کیا عقیلی اور علامہ خطیب نے اس کو المسند لابی یعلی المتفق والمفترق میں حارث کے طریق سے روایت کیا ہے اور اس کی اسناد بیان کرتے ہوئے فرمایا کہ اس میں کئی ایک مجہول روایتیں ہیں۔