18577 ۔۔۔ صفوان بن معطل سلمی (رض) سے مروی ہے کہ میں ایک سفر میں حضور اکرم (صلی اللہ علیہ وآلہ وسلم) کے ساتھ تھا ، ایک رات میں نے آپ کی نماز کی ٹوہ لی ۔ آپ نے عشاء کی نماز ادا کی پھر سو گئے ۔ جب آدھی رات بیت گئی تو اٹھ گئے اور سورة آل عمران کی آخری دس آیات تلاوت فرمائی اور سو گئے ۔ پھر تھوڑی دیر بعد اٹھے ، مسواک کی ، وضو کیا اور پھر دو رکعت نماز ادا فرمائی ۔ مجھے نہیں معلوم کہ قیام ، رکوع ، سجدوں میں کون سی زیادہ لمبی تھی (کیونکہ ہر ایک میں بہت دیر تک مشغول رہے) پھر آپ (صلی اللہ علیہ وآلہ وسلم) اٹھ گئے اور سو گئے ۔ پھر دوبارہ بیدار ہوئے اور دوبارہ سورة آل عمران کی وہی آخری دس آیات تلاوت فرمائیں اور اٹھ کھڑے ہوئے ، مسواک کی پھر کھڑے ہوئے اور وضو کیا اور دو رکعت نماز ادا فرمائی معلوم نہیں کہ ان میں قیام ، رکوع یا سجدے کون سی چیز زیادہ لمبی تھی ، پھر اٹھ کر سو گئے ۔ پھر بیدار ہوئے اور پہلے کی طرح عمل کیا اور مسلسل اسی طرح آپ کرتے رہے حتی کہ آپ نے گیارہ رکعات نماز ادا فرما لیں ۔ (رواہ ابن عساکر) فائدہ : ۔۔۔ اس میں آٹھ رکعت تہجد کی نماز ہوئی اور تین رکعت وتر کی نماز ہوئی ۔