18639 ۔۔۔ سہل بن سعد (رض) سے مروی ہے کہ حضور اکرم (صلی اللہ علیہ وآلہ وسلم) کے لیے ایک سیارونی حلہ (جوڑا) بنایا گیا ۔ جس کے کنارے سفید رکھے گئے ۔ حضور اکرم (صلی اللہ علیہ وآلہ وسلم) وہ پہن کر اپنے اصحاب کی طرف نکلے ۔ آپ نے اپنی ران پر ہاتھ مارا اور فرمایا : دیکھتے نہیں کس قدر حسین حلہ ہے یہ ؟ ایک اعرابی (دیہاتی) بولا : آپ پر میرے ماں باپ قربان ہوں یا رسول اللہ ! یہ حلہ مجھے ہدیہ فرما دیں ۔ اور رسول اللہ (صلی اللہ علیہ وآلہ وسلم) سے جب بھی کسی چیز کا سوال کیا جاتا تھا کبھی لا (نہیں) نہیں کرتے تھے ۔ لہٰذا آپ نے فرمایا : ہاں ٹھیک ہے۔ پھر آپ نے اس کو وہ حلہ عنایت فرما دیا ۔ پھر (اپنے) دو پرانے کپڑے منگوائے اور پہن لیے پھر اس حلہ کے مثل دوسرا بننے کا حکم دیا ، چنانچہ وہ بنا جانے لگا اسی دوران آپ وفات پاگئے ۔ (اور وہ بنائی کے مرحلے ہی میں رہا) ۔ (رواہ ابن جریر)