18756 ۔۔۔ حضرت سعید بن المسیب (رح) سے مروی ہے کہ انھوں نے حضرت ابوہریرہ (رض) کو ارشاد فرماتے ہوئے سنا : سیدنا حضرت ابوبکر صدیق (رض) مسجد میں تشریف لائے تو سیدنا حضرت عمر ابن خطاب (رض) لوگوں کو خطاب فرما رہے تھے : سیدنا حضرت ابوبکر صدیق (رض) گذرتے چلے گئے حتی کہ حضور اکرم (صلی اللہ علیہ وآلہ وسلم) کے کمرے میں داخل ہوگئے ۔ جہاں آپ کی وفات ہوئی تھی اور یہی حضرت عائشۃ صدیقہ (رض) کا کمرہ تھا ۔ آپ (رض) نے حضور اکرم (صلی اللہ علیہ وآلہ وسلم) کے چہرے سے یمنی چادر ہٹائی جس سے آپ کے جسم کو ڈھانپا گیا تھا ۔ آپ (رض) نے چہرے کی زیارت کی پھر اس پر جھک گئے۔ اور آپ کو بوسہ دیا پھر فرمایا : آپ پر میرے ماں باپ فدا ہوں ۔ اللہ آپ پر دو موتیں جمع نہیں فرمائے گا ، وہ موت تو آپ پاچکے ہیں جس کے بعد کبھی موت نہیں آئے گی ۔ پھر سیدنا حضرت ابوبکر صدیق (رض) مسجد میں لوگوں کے پاس گئے ۔ سیدنا حضرت عمر ابن خطاب (رض) ان کو خطاب کر رہے تھے ۔ سیدنا حضرت ابوبکر صدیق (رض) نے ان کو بیٹھنے کا حکم دیا ۔ لیکن اولا سیدنا حضرت عمر ابن خطاب (رض) نے بیٹھنے سے انکار کردیا پھر سیدنا حضرت ابوبکر صدیق (رض) نے دو تین مرتبہ آپ کو بیٹھنے کے لیے فرمایا مگر سیدنا حضرت عمر ابن خطاب (رض) نہ بیٹھے تو سیدنا حضرت ابوبکر صدیق (رض) کھڑے ہوگئے اور اللہ رسول کی شہادت دی سو لوگ آپ کی طرف آگئے اور سیدنا حضرت عمر ابن خطاب (رض) کو چھوڑ دیا۔ سو جب سیدنا حضرت ابوبکر صدیق (رض) نے تشہد مکمل کرلیا تو پھر فرمایا : ” اما بعد ! اے لوگو ! تم میں سے جو شخص محمد کی عبادت کرتا تھا تو محمد مرگئے ہیں۔ اور جو اللہ کی عبادت کرتا تھا وہ جان لے کہ اللہ زندہ ہے کبھی نہیں مرے گا ۔ اللہ تبارک وتعالیٰ فرماتے ہیں : (آیت)” وما محمد الا رسول قد خلت من قبلہ الرسل (سے) الی الشاکرین۔ (تک) جب سیدنا حضرت ابوبکر صدیق (رض) نے اس کی تلاوت کرلی تو تب لوگوں کو یقین آگیا کہ نبی (صلی اللہ علیہ وآلہ وسلم) کی وفات ہوچکی ہے۔ اور لوگوں نے سیدنا حضرت ابوبکر صدیق (رض) کے منہ سے اس آیت کو یاد کرلیا حتی کہ کچھ لوگ کہنے لگے کہ لوگوں کو علم ہی نہیں تھا کہ یہ آیت بھی نازل ہوئی جب تک کہ سیدنا حضرت ابوبکر صدیق (رض) نے اس کو تلاوت نہ فرما لیا ۔ حضرت سعید بن المسیب (رح) کا گمان ہے کہ سیدنا حضرت عمر ابن خطاب (رض) نے یہ فرمایا : اللہ کی قسم مجھے اس آیت کو سیدنا حضرت ابوبکر صدیق (رض) کے تلاوتے کرنے سے پتہ چلا پھر میں زمین پر گرگیا اور مجھے یقین ہو چلا کہ حضور اکرم (صلی اللہ علیہ وآلہ وسلم) وفات پاچکے ہیں۔ (رواہ ابن سعد)