18788 ۔۔۔ سیدنا حضرت علی المرتضی (رض) سے مروی ہے کہ میں نبی کریم (صلی اللہ علیہ وآلہ وسلم) کے پاس داخل ہوا آپ اس وقت مریض تھے ۔ آپ کا سر ایک ایسے آدمی کی گود میں رکھا ہوا تھا کہ اس سے زیادہ میں نے کوئی حسین نہیں دیکھا ۔ نبی (صلی اللہ علیہ وآلہ وسلم) سو رہے تھے ۔ میں داخل ہوا تو میں نے پوچھا : کیا میں قریب آجاؤں ؟ اس آدمی نے کہا : قریب ہوجاؤ اپنے چچا کے بیٹے کے تم مجھ سے زیادہ حقدار ہو ۔ پس میں دونوں کے قریب ہوا ، وہ آدمی اٹھ کھڑا ہوا اور میں اس کی جگہ بیٹھ گیا ۔ میں نے بھی نبی کریم (صلی اللہ علیہ وآلہ وسلم) کا سر اپنی گود میں رکھ لیا جس طرح پہلے آدمی کی گود میں تھا ۔ تھوڑی دیر گذری تھی کہ آپ بیدار ہوگئے ۔ آپ نے پوچھا وہ شخص کہاں ہے جس کی گود میں میرا سر رکھا تھا ؟ میں نے عرض کیا کہ جب میں اندر داخل ہوا تو اس نے مجھے بلا لیا اور کہا کہ اپنے چچا زاد کے قریب آجاؤ تم اس کے مجھ سے زیادہ حقدار ہو ۔ لہٰذا وہ اٹھے اور میں بیٹھ گیا ۔ آپ (صلی اللہ علیہ وآلہ وسلم) نے فرمایا : جانتے ہو وہ آدمی کون تھا ؟ میں نے عرض کیا : نہیں ۔ آپ پر میرے ماں باپ فدا ہوں ۔ فرمایا : وہ جبرائیل (علیہ السلام) تھے ۔ وہ مجھ سے بات چیت کر رہے تھے جس کی وجہ سے درد میں تخفیف ہوگئی ۔ اور میں سو گیا اور میرا سر اس کی گود میں رکھا رہ گیا ۔ (ابو عمر الزاھد فی فوائدہ) کلام : ۔۔۔ اس روایت میں محمد بن عبید اللہ بن ابی رافع ضعیف راوی ہے۔